​Трамптың бұрынғы кеңесшісі құпия деректер ісінде кінәсін мойындауға келісті

АҚШ-та Дональд Трамптың бұрынғы ұлттық қауіпсіздік жөніндегі кеңесшісі Джон Болтон құпия ақпараттың заңсыз айналымына қатысты іс бойынша кінәсін мойындауға келісті. Бұл туралы BBC екі дереккөзге сүйене отырып хабарлады.

Федералдық прокурорлар оған өткен жылы 18 бап бойынша айып таққан еді. Алғашында Болтон өзін кінәсіз деп жариялаған. Енді ол ұлттық қорғанысқа қатысты деректерді жасырғаны үшін кінәсін мойындап, 2,25 млн доллар көлемінде айыппұл төлеуге дайын екенін мәлімдеді.

Сот тыңдауы 26 маусымда өтеді. Келісімге сәйкес, Болтонға бас бостандығынан айыру жазасы қолданылмайды деп күтілуде, бірақ түпкілікті шешімді судья қабылдайды. Бұл қылмыс үшін заң бойынша 5 жылға дейін түрме жазасы қарастырылған.

Айыптау қорытындысында Болтонның ұлттық қорғанысқа қатысты аса құпия деректерді жеке жазбаларында сақтап, оларды туыстарына көрсеткені айтылған. Бұл жазбалар оның Трамп әкімшілігіндегі қызметі туралы кітап жазу барысында пайдаланылған.

Болтон Трамп әкімшілігінен кеткеннен кейін президентті ашық сынап, естелік кітабын жариялаған болатын. Прокурорлар оның құпия деректерді жеке электрондық пошта мен хабар алмасу сервистері арқылы заңсыз пайдаланғанын алға тартады.

Келісім сотпен бекітілген жағдайда, Болтон түрмеден құтылып, айыппұл төлеумен шектелуі мүмкін.

Бүгін, 14:51