Триллион теңгелік аударымдар: Kaspi мен Halyk клиенттеріне тексеріс басталды

Қазақстанда мобильді аударымдарға жүргізілген аудит нәтижесінде 115 мың азаматтың есепшоттары күмәнді деп танылды, деп хабарлайды Lada.kz. 

Қаржы министрлігі мен екінші деңгейлі банктердің бірлескен тексерісі барысында жалпы көлемі 1 триллион теңгеден асатын күмәнді транзакциялар анықталды. Министр Мәди Такиевтің айтуынша, бұл ірі компаниялар емес, қарапайым азаматтар мен өзін-өзі жұмыспен қамтығандар. 67 мың жеке тұлға карталарына шамамен 670 млрд теңге жинаған, 7,8 мың шетелдік азамат та тізімге енген, ал ресми тіркелген жеке кәсіпкерлердің үлесіне бар болғаны 200 млрд теңге тиесілі.

Көбіне такси жүргізушілері мен курьерлер жеке карталарына төлем қабылдап, кассалық аппаратты айналып өтеді. 

Салық органдары деректерді автоматты түрде алып отырады және шотқа шектеу қою немесе хабарлама жіберу үшін үш шарттың қатар орындалуы қажет: 

айына 100 және одан көп адамнан ақша түсуі, бұл жағдай 3 ай қатарынан қайталануы және жалпы сома 1 020 000 теңгеден асуы.

Хабарлама келген жағдайда бұл айыппұл емес, тек түсініктеме беру талабы. Егер қаражат туыстардан келген сыйлық, қарыз қайтару немесе қайырымдылыққа арналған жинақ екенін дәлелдесеңіз, шағым алынып тасталады. 

Ал тұрақты түрде қызмет көрсетуден табыс түссе, оны заңсыз кіріс деп танып, жеке кәсіпкер ретінде тіркелу, салық төлеу және кассасыз жұмыс үшін айыппұл төлеу қажет болады.

Азаматтарға үш негізгі қадам ұсынылады:

хабарламаны елемеу емес, 30 жұмыс күні ішінде жауап беру; банктен транзакция тарихын шығарып, заңды кірісті дәлелдеу; егер тұрақты табыс болса, мобильді қосымша арқылы ЖК ашып, жеңілдетілген 1% салық төлеу.

Бұл шаралар Kaspi мен Halyk сияқты ірі банктердің клиенттерін де қамтиды. Енді мобильді аударымдар толық бақылауда болады.

Бүгін, 18:43