Туризм министрлігі Бибісара Асаубаеваны қолдау төлемдерінің қысқару себебін түсіндірді

Қазақстанның Туризм және спорт министрлігі шахматшы Бибісара Асаубаеваға қатысты қаржылық қолдау мәселесін айтты.

Ведомство мәліметінше, спортшыға дайындық үшін 2024 жылы 64 млн теңге бөлінген, ал 2026 жылы Sport Qory қоры арқылы 100 млн теңге қарастырылған. Сонымен қатар, ол Қазақстан шахмат федерациясы тарапынан да қаржыландырылады.

Министрліктің дерегінше, жалпы қолдау көлемі биыл шамамен 160 млн теңгені құрады. Бұл көрсеткіш жыл сайын өсіп отырғанын атап өтті.

Вице-министр Серік Жараспаевтың айтуынша, 2025 жылдан бастап спортшыларды қаржыландыру заңнамадағы өзгерістерге сәйкес, тек басым спорт түрлерінің тізіміне енгізілген бағыттар бойынша жүзеге асырылады. Шахмат бұл тізімге кірмегендіктен, келісімшарттағы төлемдер қайта қаралған.

Сонымен бірге министрлік Бибісара Асаубаеваның жетістіктерін ерекше атап өтті. Ол үш жыл қатарынан халықаралық деңгейде жоғары нәтиже көрсетіп келеді және Мемлекет басшысының Жарлығымен «Барыс» орденінің II дәрежесімен марапатталған.

Ведомство басқа жас шахматшылардың да табыстарын мысалға келтіріп, Қазақстанда шахматты дамыту жұмыстары жалғасып жатқанын айтты: жаңа секциялар ашылып, турнирлер ұйымдастырылып, арнайы даму тұжырымдамасы іске асырылуда.

Бұл түсіндірме спортшының соңғы уақыттағы қаржылық қиындықтар туралы мәлімдемесінен кейін берілді.

Бүгін, 19:09