Түркістан облысында ерте пісетін көкөніс егіліп жатыр

Елдің солтүстігі мен шығысында қыс қаһарына мініп тұрса, оңтүстікте ерте пісетін көкөніс дақылдарын егу жұмыстары басталды.

Түркістан облысының Мақтаарал ауданында диқандар қызылша, қырыққабат дақылдарын заманауи тамшылатып суару технологиясы арқылы егіп жатыр. Мамандар бұл әдіс су ресурстарын үнемдеуге, тыңайтқыштарды өсімдік түбіне дәл жеткізуге және өнімділікті арттыруға мүмкіндік беретінін айтады. 

Мақтаарал ауылының тұрғыны Шағыр Күшербаевтың 27 гектар егістік жері бар. Ауыл шаруашылығы саласында тәжірибесі мол шаруа оған жыл сайын бақша, көкөніс және мал азығы дақылдарын егеді. Жер емген диқан бүгінге дейін 8 гектар алқапқа қызылша көшетін заманауи тамшылатып суару технологиясы арқылы пленканың астына егіп үлгерген.

Шағыр Күшербаев, шаруа:

- Бұл қызылшаны 4 жылдан бері егіп жатырмыз. Бірінші жылдан бастап тамшылатып суару жүйесі арқылы суарамыз. Дәрілерін де тамшылатып береміз. Фосфор, калий, азот деген тыңайтқыштарды үлкен ыдысқа араластырамыз. Ол да оңай. Адамға істетпейміз, техника да кірмейді. Сумен келеді. Сәуірдің 15-нен бастап қымбат кезде піскендерін үзіп-үзіп аламыз. Ал кейін бағасы түсіп кеткен кезде жерді айдап екінші өнімді егеміз.

Диқан енді 10 гектарға қырыққабат көшетін екпек. Оны да тамшылатып суаратынын айтады. Биыл аудан шаруалары 60 мың гектар егістік алқапты игермек. Оның ішінде 1500 гектарына ерте пісетін көкөніс дақылдарын су үнемдеу технологиясын пайдалану арқылы егу жоспарланып отыр.

Биыл облыста ауыл шаруашылығы дақылдары 919 мың гектар жерге егіледі. Оның 536 мың гектары – жаздық, 208 мың гектары – күздік дақылдар, ал 175 мың гектарға көпжылдық жоңышқа егіледі деп күтілуде.

Әлібек Плалов, облыстық Ауыл шаруашылығы басқармасы басшысының орынбасары:

- Биыл мақта 162 мың гектарға орналастырылатын болады. Сондай-ақ біз жүгері дақылдарын 55 мың гектарға, одан бөлек майлы дақылдарын 85 мың гектарға егеміз. Жалпы биылғы жылы 42 мың гектарға көкөніс дақылдарын егу жоспарланса, қазіргі таңда оңтүстік аудандарда ерте пісетін көкөніс егу жұмыстары басталып кетті. Биыл 8 мың гектар алқапқа қырыққабат дақылы егілетін болады.

Ауыл шаруашылығы саласын дамыту және өңір тұрғындарын сапалы отандық өніммен қамтамасыз ету мақсатында биыл облыстағы агроқұрылымдарға 35 млрд теңге жеңілдетілген несие берілмек. Бүгінге дейін жүздеген шаруа 5 млрд теңгедан астам қаражатты алып үлгерген.

Өткен жылы өңірде 59 мың гектар алқапқа су үнемдеу технологиялары  енгізіліп, жалпы көлемі 114 мың гектарға жетті. Нәтижесінде 195 млн текше метр су үнемделді. Жыл сайын қосымша 50 мың гектарға жаңа технология енгізу арқылы 2030 жылға қарай 364 мың гектар жерден 622 млн текше метр су үнемдеу көзделіп отыр. Бұл – су тапшылығы жағдайында стратегиялық маңызы бар көрсеткіш, - дейді мамандар.

Авторлары: Жандос Жұмабек, Ерболат Әбіш