Түркістанда айыппұлға ашуланған бұзақылар бейнекамераларды сындырды

АСТАНА, 29 наурыз – Sputnik. Түркістанда көшедегі бейнебақылау камераларын сындырған бұзақылар ұсталды, деп хабарлайды Sputnik Қазақстан Polisia.kz порталына сілтеме жасап.

Бетперде киген екі жігіт түнгі сағат 01:00 шамасында ұзын ағашпен төрт камераны әдейі сындырған. Полицейлер осы қылмысты ашу үшін жақын маңдағы бейнебақылау жүйелерінің жазбаларын мұқият зерделеп шықты. Соның нәтижесінде күдіктілердің қозғалыс бағыты анықталды. Екеуі де жедел іздестіру шаралары кезінде қолға түсті.

"Алдын ала мәліметке сәйкес, күдіктілер жол ережесін бұзғаны үшін салынған айыппұлға ашуланып, осы әрекетке барған", - дейді полицейлер.

Қазіргі кезде бөтеннің мүлкін қасақана жою немесе бүлдіру фактісі бойынша қылмыстық іс қозғалды. Материалдық шығынның жалпы сомасы 700 мың теңгеден асып отыр.