Үкімет Алакөлге миллиардтар бөлді не өзгереді

Қазақстан үкіметі Жетісу облысындағы Алакөл көліне қорғаныс бөгетін салуға 3 миллиард теңге бөлді. Тиісті қаулыға премьер-министр Олжас Бектенов қол қойды, деп хабарлайды Tengrinews.kz.

Қаражат су шаруашылығы инфрақұрылымын дамыту жөніндегі Президент тапсырмаларын орындау аясында үкімет резервінен бөлінді.

Бөлінген қаражат ұзындығы 6 шақырым болатын қорғаныс бөгетінің құрылысына жұмсалады. Оның 2,5 шақырымы Көктұма ауылының маңында, тағы 3,5 шақырымы Ақши ауылының жанында салынады.

Үкімет ақпаратынша, нысан көлдің жағалау сызығын нығайтуға және шөгінділерді тасымалдау мен қайта бөлу жүйесін жақсартуға мүмкіндік береді, бұл жағалауды одан әрі бұзылудан қорғауға көмектеседі.

Алакөлдегі жағалауды нығайту жұмыстары бірнеше жылдан бері жүргізіліп келеді. 2025 жылы ұзындығы 1,7 шақырымдық учаскеде жер және бетон жұмыстары аяқталып, жағалау сызығын бекіту үшін габионды конструкциялар орнатылды.

Жобаның жаңа кезеңі қорғаныс инфрақұрылымын құруды жалғастыруға жол ашады.

Бөгет құрылысы жағалау сызығын сақтап қана қоймай, өңірдің туристік әлеуетін одан әрі дамытуға жағдай жасайтыны атап өтілді.

Google News арқылы жаңалықтарымызды қадағалаңыз