Украина бойынша келіссөз жүргізушілер нәтижеге өте жақын тұр Трамп

АСТАНА, 31 қаңтар – Sputnik. АҚШ президенті Дональд Трамп Украинадағы қақтығысты реттеу бойынша келіссөз жүргізушілер нәтижеге өте жақын тұрғанын мәлімдеді.

"Біз келісімге қол жеткізуге өте жақын тұрмыз", – деді Трамп Ақ үйде жарлықтарға қол қою барысында.

Ресей, АҚШ және Украинаның қауіпсіздік мәселелері жөніндегі өкілдері қатысқан үшжақты жұмыс тобының келіссөзі Біріккен Араб Әмірліктерінің астанасы Абу-Дабиде 24 қаңтарда аяқталды. БАӘ үкіметі кездесуді оң және сындарлы өтті деп бағалап, Ресей мен Украина делегацияларының тікелей байланыс орнатқанын атап өтті.

Сәрсенбі күні Ресей президентінің баспасөз хатшысы Дмитрий Песков журналистерге осы форматтағы келесі кездесу шамамен 1 ақпанда өтуі мүмкін екенін хабарлады. Ал АҚШ мемлекеттік хатшысы Марко Рубио Украинадағы қақтығысты реттеу жөніндегі келіссөздің жаңа раунды екіжақты форматта өтетінін, бірақ оған АҚШ қосылуы мүмкін екенін мәлімдеген болатын.