Ұлттық банк төрағасы азаматтарға ипотекаға үй алуды кейінге қалдыруға кеңес берді

Egemen.KZ парақшасындағы деректерге сәйкес, Qazaq24.com ақпарат таратты..

Ұлттық банк төрағасы Тимур Сүлейменов ел азаматтарын баспана несиесін рәсімдеуде асығыстық танытпауға шақырды. Оның пайымынша, қазіргідей инфляция жоғары және базалық мөлшерлеме шыңында тұрған кезеңде қарыз алу – азаматтардың қалтасына ауыр салмақ салады, деп хабарлайды Egemen.kz.

Ұлттық банк басшысы несие нарығындағы қазіргі жағдайдың уақытша екенін алға тартты. Оның айтуынша, инфляция деңгейінің төмендеуі базалық мөлшерлеменің азаюына, ал бұл өз кезегінде екінші деңгейлі банктердің пайыздарын төмендетуге әкеледі.

«Нарықтағы пайыздық мөлшерлемелер жоғары кезеңде несие мен ипотека рәсімдеуден тартына тұрып, оны кейінге қалдырған дұрыс. Инфляция бәсеңдеген сайын базалық мөлшерлеме де азаяды, сонымен бірге банктік пайыздар да азаяды. Аздап күте тұру керек», деп атап өтті Ұлттық банк төрағасы.

Оның пайымынша, сабыр сақтаған қарыз алушылар болашақта анағұрлым тиімді шарттарды пайдалана алады. Ақша-несие саясаты тұрақталған кезде, қарыз жүктемесі халық үшін әлдеқайда жайлы болмақ.

Қазақстанда ипотека бойынша пайыздық мөлшерлемелер неге төмендетілмеді?

Еске салайық, 2025 жылғы маусым айының ортасында ипотекалық несиелер бойынша жылдық тиімді сыйақы мөлшерлемесін (ЖТСМ) 25%-дан 20%-ға дейін төмендету жоспарланған болатын. Осыған байланысты Қаржы нарығын реттеу және дамыту агенттігі мен Ұлттық банк тиісті қаулы қабылдаған еді. Басты мақсат – ипотекалық тұрғын үй несиелерінің қолжетімділігін арттыру.

Алайда 2025 жылғы 17 маусымда Қаржы нарығын реттеу және дамыту агенттігі мен Ұлттық банк ипотека бойынша ең жоғары мөлшерлемені 20%-бен шектеу нормасының қолданылуын тоқтата тұру туралы бірлескен қаулы шығарды. Құжатқа сәйкес, төмендетілген мөлшерлеме 2025 жылғы 1 қарашадан бастап күшіне енуі тиіс болған.