Ұлытауда жас кәсіпкерлерді қолдау артты

Ұлытауда жас кәсіпкерлерді қолдауға жалпы сомасы 400 миллион теңге бөлінеді.

Қаржы қайтарымсыз грант түрінде бизнес ашуға немесе кәсіпті кеңейтуге қарастырылған. Мамандардың айтуынша, облыста жыл сайын грант алуға үміткерлер артып келеді. Осыған дейін мемлекет қолдауын иеленген жастар қазір табысқа кенеліп отыр.

Үш мыңға жуық тұрғыны бар Жезді кентінде наубайхана болмаған. Нан өнімдері 50 шақырым қашықтағы Жезқазғаннан әкелінетін. Былтыр Гүлнәр Жаналинова шағын наубайхана ашып, осы олқылықтың орнын толтырды. Кәсіпкер күніне 500 бөлке нан пісіретін нысанды кеңейтуді қолға алмақ.

Гүлнәр Жаналинова, кәсіпкер:

- Облыстық грант ұтып алдым. Содан ол маған өте көмек болды. Жаңадан тестомес алдым, нан ашытатын аппарат және электропеш. Қазір енді қарамағымда 6 адам бар. 

Бизнес идеяның көлемі мен маңыздылығына  байланысты берілетін  қаржының көлемі әр түрлі. 1 млн-нан 7 млн теңгеге дейін. Қомақты сома негізінен жұмыс істеп тұрған кәсіпті кеңейтуге беріледі. Мысалы автомектеп иесі Думан Қорғанбеков осы мүмкіндіктің нәтижесінде шағын кәсіпті ірі оқу орталығына айналдырған. 5 млн теңге грант есебінен қосымша құралдар сатып алды. Қазір мұнда мемлекетік тапсырыспен есепшілер, аспаз, іс қағаздарын жүргізуші мамандар тегін оқиды.

Думан Қорғанбеков, кәсіпкер:

- Кәсіпті именно әрі қарай дамытуға үлкен қолдау. Ол әрі қарай жаңағы кәсіпкер білгеннен кейін, түсінгеннен кейін оны дамытуға өте үлкен көмек. 

Қайтарымсыз грант былтыр Думан сияқты тағы 140-тан астам жас кәсіпкерге бұйырды. Олардың жартысы ауылда тұрады. Берілген қаржының жалпы көлемі 300 млн теңгеге жуық.

Нұржан Сағындық, кәсіпкерлік және өнеркәсіп басқармасының бөлім басшысы: 

- 2026 қайтарымсыз грант мөлшері былтырғы деңгейден әрине жоғары болады. Өйткені қазір тұрақты өсім, оң динамика байқалуы себепті жоғары қаржы бөлінетін болады. 300-400 млн көлемінде. 

Былтыр өңірдегі шағын және орта кәсіпорындар 180 млрд теңгенің өнімін өндірген. Ұлттық кәсіпкерлік палатасының рейтінгісіне сәйкес, 2025 жылдың қорытындысы бойынша облыс кәсіпкерлікпен айналысуға ең қолайлы өңір деп танылды. Биыл әкімдік тарапынан тағайындалатын грантқа өтініштерді іріктеу кезінде ІТ және туризм салаларына басымдық беріледі дейді мамандар. 

Елдос Кәкенов, Нұрлан Исмаилов, Гүлшаһира Серекбаева