ҰҚК: Шымкентте Экономикалық тергеп тексеру департаменті қызметкеріне қатысты тергеу басталды

2 наурыз күні әлеуметтік желілерде ер адамның жол жиегінде тұрған автокөлік жанында арнайы қызмет өкілдері тарапынан ұсталған сәті түсірілген фото жарияланды.

Желі қолданушыларының жазуынша, ҰҚК-ның сыбайлас жемқорлыққа қарсы қызметі Шымкентте қалалық Экономикалық тергеп-тексеру департаментінің қызметкерін пара алды деген күдікпен ұстаған болуы мүмкін. Алдын ала мәлімет бойынша, пара көлемі шамамен 300 мың теңгені құраған.

Посмотреть эту публикацию в Instagram

Публикация от Открывай Шымкент (@open.shymkent)

Осыған байланысты Kazinform редакциясы аталған дерекке қатысты Ұлттық қауіпсіздік комитетіне ресми сауал жолдап, департамент қызметкерінің шынымен ұсталған-ұсталмағанын, пара сомасы туралы ақпараттың қаншалықты рас екенін, сондай-ақ күдіктінің процессуалдық мәртебесі мен ақшаның берілу жағдайын нақтылауды сұрады.

Ұлттық қауіпсіздік комитеті тергеу жүргізіліп жатқанын растады.

– Қазіргі уақытта сотқа дейінгі тергеу амалдары жүргізіліп жатыр. Қылмыстық-процестік кодекстің 201-бабы 1-бөлігіне сәйкес өзге ақпарат жария етуге жатпайды, - деп хабарлады ҰҚК ресми сауалға берген жауабында.

Бұған дейін СҚО-да түзеу мекемесінің бастығы ұсталғанын ҰҚК растады.

Сонымен қатар ҰҚК Шекара қызметі 60 млн теңгелік темекі контрабандасының жолын кесті.