YouTube кейбір арналарды монетизациядан айырады не өзгерді

YouTube монетизация ережелерін нақтылап, кейбір авторлардың бұдан былай YouTube серіктестік бағдарламасы (YPP) аясында табыс таба алмайтынын ескертті. Өзгерістер жасанды интеллектіні пайдалануға жаңа тыйым салмайды, тек қандай мазмұн "бейаутентикалық" (inauthentic content) деп саналатынын және табыс алуға жарамсыз екенін егжей-тегжейлі түсіндіреді, деп хабарлайды Tengri Life.

TechCrunch мәліметінше, жаңартылған түсіндірме 16 шілдеден бастап күшіне енді және серіктестік бағдарламасының барлық қатысушысына қолданылады. Бұл ретте компания өкілдері әңгіме жаңа шектеулердің пайда болуы емес, бұрыннан бар саясатты нақтылау туралы болып отырғанын баса айтты.

Жарияланған YouTube өзгерістер журналына сәйкес, компания 2025 жылғы 15 шілдеде бұрын "қайталанатын контент" (repetitious content) деп аталған ережені жаңартты. Енді ол "бейаутентикалық контент" (inauthentic content) деп аталады. YouTube мұндай контенттің бұрын да монетизацияға құқығы болмағанын түсіндірді.

"Біз "қайталанатын контентке" қатысты саясатымызға шағын өзгеріс енгізіп отырмыз, бұл оның қайталанатын немесе жаппай өндірілетін контентке қатысты екенін анығырақ көрсету үшін қажет. Сондай-ақ біз бұл саясат атауын "бейаутентикалық контент" деп өзгертеміз. Мұндай контент біздің түпнұсқа және аутентикалық материалдарды қолдауға бағытталған қолданыстағы ережелеріміз бойынша әрқашан монетизация талаптарына сәйкес келмеген", - делінген хабарламада.

Бұл ретте компания қайта пайдаланылған контентке (reused content) қатысты саясат өзгермегенін атап өтті. Бұл шолу, пікір, реакция, үзінді мен жинақ бұрынғыдай жеке ереже бойынша қарастырылатынын білдіреді.

Не өзгерді?

Негізінде, YouTube жаңа тыйым енгізген жоқ, тек қолданыстағы талаптарды түсініктірек етті. Енді платформа контенттің қандай түрін "бейаутентикалық" деп санайтынын және олар неге серіктестік бағдарламасына қатыса алмайтынын егжей-тегжейлі түсіндіреді.

YouTube монетизация түпнұсқа контент авторларына ғана қолжетімді екенін еске салды. Егер материалдар тек қаралым жинау үшін жасалса және шаблон бойынша жаппай шығарылса, олар бағдарлама талаптарына сәйкес келмеуі мүмкін.

Қандай видео монетизациядан айырылуы мүмкін?

Енді YouTube "бейаутентикалық контентті" үш санатқа егжей-тегжейлі бөледі.

Қайталанатын және шаблон роликтер

Бірінші санат - типтік, қайталанатын немесе шаблон контент. Бұл жерде бір-бірінен айырмашылығы аз, соның ішінде жасанды интеллект, CGI немесе дайын шаблондарды пайдаланып жаппай жасалған роликтер туралы сөз болып отыр.

YouTube сенім және қауіпсіздік бағытының жетекшісі Мэтт Хэлприннің айтуынша, егер кейбір оқу роликтері түпнұсқа материал ұсынбай, платформада кең таралған мазмұнды қайталаса, олар да осы санатқа жатуы мүмкін.

"Жасанды интеллект адамдарға көптеген видео жасауға мүмкіндік беретіні рас. Кейде бұл видеолар өте сапалы шығып, шығармашылық мүмкіндіктерді арттырады. Көптеген сапалы контент шығаруға болады және біз серіктестік бағдарламасы аясында соны қолдағымыз келеді", - деп атап өтті ол.

Алайда, оның айтуынша, осы құралдар көмегімен бір-біріне ұқсас көптеген роликті де тез өндіруге болады.

"Олар өте біркелкі, біртұтас баяндауы жоқ және автордың шығармашылық көзқарасын көрсетпейді. Бір технология жақсы дүние жасауға мүмкіндік берсе, сонымен бірге өзіндік "контент фермаларының" пайда болуына ықпал етеді. Осындай мазмұнды біз YouTube Partner Program аясында көргіміз келмейді", - деді ол.

Эмоциялық манипуляцияға негізделген контент

Екінші санат YouTube "off-putting" деп атайтын контентке қатысты - бұл жағымсыз эмоциялар тудыратын немесе қаралым үшін әдейі эмоциялық манипуляцияға негізделген видеолар.

Мысал ретінде Хэлприн жануардың қиын жағдайда қалғанын, содан кейін оның құтқарылғанын көрсететін роликтерді келтірді.

"Біз көрермендерден мұндай контент оларға ұнамайтынын естідік. Олар мұны жағымсыз деп санайды. Соның кесірінен олар мұндай каналға да, кейде тіпті платформаның өзіне де оралғысы келмейді", - деді ол.

YouTube өкілінің айтуынша, осындай видеоларға маманданған арналар роликтерді жасау кезінде жасанды интеллект пайдаланылғанына қарамастан, серіктестік бағдарламасынан шығарылуы мүмкін.

Қаржы және денсаулық туралы роликтердегі ЖИ-кейіпкерлер

Үшінші санат нәзік тақырыптарды талқылау үшін ЖИ арқылы жасалған адамдардың цифрлық бейнелерін (AI personas) пайдалануға қатысты.

Бұл қаржы, заң мәселелері, медицина және денсаулыққа арналған видеоларға қатысты. YouTube егер мұндай мазмұн ЖИ-кейіпкерлердің көмегімен жасалса, оны монетизациялауды қолдағысы келмейтінін мәлімдеді.

ЖИ пайдалануға тыйым салынбайды

YouTube өзгерістер жасанды интеллектіні пайдалануға тыйым салуды білдірмейтінін ерекше атап өтті.

Ресми ережеде контент авторлық болуы тиіс және ол тек қаралым жинау үшін емес, ең алдымен көрермендердің игілігі немесе көңіл көтеруі үшін жасалуы керек екені айтылған.

Платформа талаптарына сәйкес, материалдар келесідей болмауы тиіс:

жаппай өндірілген; шаблонды; бірсарынды; қайталанатын; манипулятивті.

Арналарды тексеру кезінде модераторлар олардың негізгі тақырыбын, ең танымал және жаңа роликтерін, сипаттамасын, метадеректерін және басқа да материалдарын бағалай алады.

Арна монетизациядан қашан ажыратылуы мүмкін?

Мэтт Хэлприннің түсіндіруі бойынша, егер арнада аталған үш санаттың кем дегенде біреуіне жататын контент тым көп болса, мұндай арна YouTube Partner Program бағдарламасына қатыса алмайды.

YouTube серіктестік бағдарламасының жұмысы тікелей жарнама берушілердің сеніміне байланысты екенін еске салды.

"Арнаңыздың және YouTube Partner Program бағдарламасының сәттілігі жарнама берушілердің өз брендтерін YouTube контентінің жанына орналастыруға дайындығына байланысты. Жарнама берушілер сенімін жоғалтқанда, бұл барлық автордың табысына теріс әсер етеді", - деп атап өтті компания өкілдері.

Сондай-ақ компания ереже бұзғаны үшін түрлі шара қолданылуы мүмкін екенін атап өтті - жекелеген видеолардан түсетін табысты шектеуден бастап, монетизацияны уақытша өшіруге, серіктестік бағдарламасынан шығаруға немесе ереже өрескел бұзылған жағдайда арнаны жоюға дейін.

Бұл авторлар үшін нені білдіреді?

Жаңа түсіндірме YouTube-тің жасанды интеллектіне қатысты саясатын өзгертпейді, бірақ бағалау критерийлерін ашық етеді. Платформа бұрынғыдай ЖИ-ді контент жасау құралы ретінде пайдалануға рұқсат береді, алайда авторлар оны табыс табу үшін бірсарынды роликтерді жаппай шығаруға емес, бірегей материалдар жасауға қолданады деп үміттенеді.

Серіктестік бағдарламасына қатысушылар үшін бұл YouTube жекелеген видеоларға ғана емес, арнаның жалпы тұжырымдамасына және ондағы түпнұсқа емес контенттің үлесіне де назар аударатынын білдіреді.

Жақында YouTube Live тікелей эфирлер бөліміне арналған жаңартуларды жариялады. Платформа эфирдің ең белсенді сәттерінде барлық көрерменге жарнаманы уақытша өшіруге мүмкіндік беретін функцияны сынақтан өткізіп жатыр.

Айта кетейік, YouTube платформасы 2025 жылы жарнамадан ең ірі төрт Голливуд медиакомпаниясы жиынтығынан да көп табыс тапты. Moffett Nathanson зерттеу компаниясының бағалауы бойынша, сервистің жарнамалық түсімі 40,4 миллиард долларға жеткен.

Google News арқылы жаңалықтарымызды қадағалаңыз

Жазылу