ЮНЕСКО ның техникалық грантын жүзеге асыру жайы талқыланды

Еліміз материалдық емес мұраны сақтап қалу үшін ЮНЕСКО-ның техникалық грантын жүзеге асырып жатыр. Осы жұмыстар Атырау, Шығыс Қазақстан, Қарағанды, Қызылорда және Жетісу облыстарында ұйымдастырылады. 

Қазақ халқының ұмытыла бастаған дәстүрін жаңғырту мен дәріптеу үшін бірқатар жоба қолға алынған. Бұған цифрлық медиа көмекке келеді. Осылайша, жергілікті жұрттың өзіне тән бірегей мәдениеті дәріптеледі. Атап айтқанда, өңірлер алдында қазақтың ұмыт бола бастаған дәстүрлі мәдениет элементтерін жаңғырту және оларды насихаттаудың заманауи тәсілдерін, соның ішінде цифрлық медианы енгізу міндеті тұр. 

Облыс өкілдері грант аясындағы жұмыстардың аралық нәтижелері туралы баяндады. Бірінші кезеңнің қорытындысы бойынша Ұлттық материалдық емес мәдени мұра тізіміне шамамен 40 жаңа элементті енгізу ұсынылды. Олардың қатарында «Кербез қыз» ғұрпы, Бестемше ойыны, етікшілік кәсіп, диірменшілік, «Қалқаман – Мамыр» поэмасын орындау және тағы басқалары бар.

Мемлекеттік қызметкерлер, педагогтар мен қоғам белсенділері мәлімет жинау және дәйектеуге үйретіледі. Сондай-ақ олардан ұлттық тізімге енгізетін жаңа элементтер табу сұралып отыр. Грантты игеру бірегей тәжірибені сақтап, оны ұрпаққа аманаттауға ықпал етуі тиіс.