Жамбыл облысында ирригациялық жүйелер жаңартылады

Жамбыл облысында ирригациялық жүйелерді жаңғырту бойынша үш жоба қолға алынған. «Өтеміс» каналында 28 шақырымдық учаскеде бетон төселіп, гидротехникалық нысандар жөнделіп жатыр. Құрылыс жұмыстарына 47 адам мен 17 арнайы техника жұмылдырылды. Бүгінгі таңда оның  15,7 шақырымы дайын. Бұл жүйе арқылы суарылатын жер көлемі 5 мың гектардан асады.

Қазір нысан 1626 гектар егістік алқапты сумен қамтамасыз етіп отыр. «Сеңкібай» каналында ұзындығы 14 шақырымнан асатын учаскеде жөндеу жұмыстары аяқталды. Бағдарлама шеңберінде 21,8 шақырым суару жүйесін жаңарту көзделген. Кешенге 13 арнайы техника мен тоғыз маман тартылды. 4075 гектар егістік алқапқа су жеткізеді. Ал «Белқожа» жүйесінде 20 шақырымға жуық учаскеге бетон құйылады. Оның шамамен 16 шақырымы аяқталды. Жалпы суарылатын жер көлемі 2896 гектарға жетеді. Су ресурстары және ирригация министрі Нұржан Нұржігітов келесі жылы вегетациялық кезең тұрақты өтуі үшін жұмыстардың сапалы әрі уақтылы орындалуын бақылауды тапсырды.