Жамбылда ірі электр станциясының құрылысы басталады

Жамбылда қуаттылығы 1 гигаватт болатын жел электр станциясының құрылысы биыл басталады.

Қазір жобаны қаржыландыру ісі жүріп жатыр. Бұл туралы еліміздегі жаңартылған энергия өндірісін қолға алған әмірлік компаниясының өкілдері арнамызға берген сұхбатында мәлімдеді. Абу Дабиде өткен тұрақты даму апталығында әлемнің 30-дан астам мемлекетінде жүзеге асырылып жатқан баламалы қуат өндіру жобалары таныстырылды. Барлығы араб тарапының инвестициясы есебінен іске асқан. Сол қатарға таяу арада Қазақстан қосылмақ. Мамандардың айтуынша, Жамбылдағы жел электр станциясы Орталық Азияда теңдессіз болады. Себебі оның жанынан 600 мегаватт-сағатқа дейін энергия сақтау кешені бой көтереді. Келісім аясында жобаға 1,4 млрд доллар инвестиция тартылады.

Мариям Рашид Әл Мазроуи, БАӘ Жаңартылған энергия өндіру компаниясының бөлім басшысы:

- Энергетикалық форумға қазақстандық әріптестеріміз де келді. Олармен кездесу үшін Астанаға тұрақты түрде барып тұрамыз. «Самұрық Қазына»-ның еншілес компаниясы және электр желілеріне жауапты мекемелермен стратегиялық қарым-қатынас орнаттық. Энергетика министрлігі бұл іске оң ықпал етіп келеді. Жалпы жоба қаржыландыру кезеңінде. Құрылысты биыл бастауды жоспарлап отырмыз.  

Еске салайық, Біріккен Араб Әмірліктері жел, күн және судан экологиялық таза энергия өндіру ісінде әлемде көшбасшы болуды көздейді. Осыған жауапты компания ел ішінде бірнеше жобаны сәтті жүзеге асырған. Сондай-ақ шет мемлекеттерде станциялар құрылысын қаржыландырылып, барлық тарапқа игілігін көрсетіп отыр. Былтыр жер жүзіндегі жаңартылған энергия нысандарының жалпы қуаттылығын 65 гигаватқа жеткізген.