Жангелдиндегі отбасы мүшелерін өлтіру ісінде қылмыстардың жасалу мерзімі анықталды ​

Атырау облысының Жангелдин ауылында Қарабалиндер отбасы мүшелерінің өліміне қатысты тергеу қылмыстардың бір мезгілде жасалмағанын көрсетті: алғашқы және кейінгі эпизодтар арасында бірнеше ай айырмашылық болған.

Прокуратураның дерегіне сәйкес, Наурыз Мұқанғалиевты күдікті Сұлтан Сәрсемалиев мамыр айында, ал қалған үшеуін қарашада өлтірген. 

Тергеу оның қылмысты жалғыз өзі, үшінші тұлғалардың қатысуынсыз жасағанын анықтады. Сот-психиатриялық сараптама қорытындысына сәйкес, Сәрсемалиев ақыл-есі дұрыс деп танылған және өз әрекеттері үшін жауап бере алады.

Атырау облысы прокурорының көмекшісі Жандар Болатбектің айтуынша, қаза тапқандардың денелерінде асүй пышағымен салынған кесілген-шаншылған көптеген жарақаттар тіркелген. 

- Әрқайсысында кеуде, мойын және өмірлік маңызды ағзалар аймағында алтыдан астам жарақат бар, — деп нақтылады ол.

Ал Сәрсемалиевтің жары әрі қаза тапқандардың қызы Ақбаян Мұқанғалиеваға қатысты түпкілікті қорытынды әлі шыққан жоқ. Атыраудағы сарапшылар оның психикалық жағдайына нақты баға бере алмағандықтан, Алматыда қосымша сот-психиатриялық сараптама тағайындалды.

Марқұмдардың туыстары сот процесінің ашық өтуін талап етіп, онда барлық мән-жайдың жария етілуіне үміт артып отыр.

Қылмыстық іс мамыр айында сотқа жолдануы мүмкін. Тергеу жалғасуда.

Айгүл МАНСУРОВА

Бүгін, 12:30