Жаның жәннатта болсын : Бір ғана киносымен елдің жүрегін жаулаған танымал режиссер өмірден өтті (ФОТО)

Атақты Disney студиясының "Арыстан патша" ("Король Лев") анимациялық фильмінің режиссерлерінің бірі Роджер Аллерс 76 жасында өмірден өтті. Бұл туралы америкалық продюсер Дэйв Боссерт Facebook желісіндегі парақшасында хабарлады, деп жазады Arasha.kz.

"Досымыз Роджер Аллерстің өмірден өткенін естіп, қатты күйзелдім. Өткен аптада ғана Мысырда сапарда жүрген кезінде хат алысып тұрған едік. Сондықтан бұл хабар тіпті сенгісіз болып отыр. Жаның жәннатта болсын, досым. Ол жақта тағы жолығармыз", – деп жазды Боссерт.

Продюсер Роджер Аллерсті "ерекше дарынды суретші әрі режиссер", сондай-ақ "Disney анимациясының қайта өрлеу дәуіріндегі басты тұлғалардың бірі" деп атады.

Роджер Аллерс Disney компаниясындағы жолын 1982 жылы шыққан "Трон" фантастикалық фильміне арналған предпродакшн тұжырымдамаларын әзірлеуден бастаған. Кейін "Оливер және компания", "Русалочка" мультфильмдерінде суретші болып еңбек етті. Ал "Сұлу мен Құбыжық" фильмінде оқиға желісіне жауапты жетекші маман қызметін атқарды. Уақыт өте келе ол "Арыстан патша" мультфильмінің қосалқы режиссері болды.

Дэйв Боссерт Роджер Аллерспен 1980 жылдардың соңы мен 1990 жылдар бойы көптеген жобада бірге жұмыс істегенін айтты.

"2006 жылы жарық көрген "Шырпы сатқан қыз" жобасында бірге еңбек еттік. Оның таңғалуға толы сезімі, жомарттығы мен шынайы құлшынысы айналасындағының бәріне шабыт сыйлайтын. Роджердің бойында ерекше жарық, мейірімді рух бар еді, онсыз әлем біршама сұрқай тартып қалғандай", – деп қосты ол.

Марқұмның қазасына байланысты Disney продюсері Дон Хан, аниматор Дэйв Вудман және Disney компаниясының бас директоры Боб Айгер де әлеуметтік желілерде көңіл айтты.