Жақын, алыс немесе тұманға қарсы ма? Айыппұл арқаламау үшін қандай фараларды пайдалану керек

Автокөлік фаралары - бұл жай ғана қараңғыда жолды жарықтандыру тәсілі емес. Қандай жарық құралдарының қосулы тұрғанына жүргізушінің, жолаушылардың және жол қозғалысының басқа да қатысушыларының қауіпсіздігі тікелей байланысты. Бұл ретте фараларға қатысты сұрақтар тіпті жүргізуші куәлігін баяғыда алғандардың өзін жиі қиындыққа қалдырады.

Қандай жағдайларда алыс жарықтан жақын жарыққа ауысу қажет? Тұманда немесе жаңбыр кезінде тек габариттік шамдармен жүруге бола ма? Tengri Auto негізгі ережелерді талдап, әрбір жүргізуші білуі тиіс жағдайларды еске түсіруді жөн көрді.

Тәуліктің әртүрлі уақытында қандай фараларды қосу керек?

Ең алдымен есте сақтайтын нәрсе: Қазақстанда жолдың қаншалықты жақсы көрінетініне ғана сүйенуге болмайды. Ережелер жарық құралдарын пайдалануға қатысты нақты талаптарды қарастырады.

Күндіз

Қозғалыстағы көлікте жақын жарық фаралары немесе күндізгі жүріс шамдары (КЖШ) қосулы болуы тиіс. Бұл табиғи жарық жақсы болған күннің өзінде автомобильдің жол қозғалысының басқа қатысушыларына көрінуі үшін қажет.

Түнде

Тәуліктің қараңғы уақытында жүргізуші габариттік шамдарды және жақын немесе алыс жарық фараларын пайдалануға міндетті. Таңдау жолдың жарықтандырылуына және жол жағдайына байланысты болады.

Тоннельде

Тоннель жақсы жарықтандырылған болса да, габариттік шамдарды және фаралардың жақын немесе алыс жарығын қосу қажет. Бұл үшін тек күндізгі жүріс шамдары жеткіліксіз.

Көрінуі шектелген жағдайларда. Тұман, нөсер жаңбыр немесе қалың қар кезінде жүргізуші тиісті жарық құралдарын пайдалануы тиіс. Мұндай жағдайларда тұманға қарсы фараларды жеке немесе жақын не алыс жарықпен бірге қосуға болады.

Алыс жарық: қашан қосуға болады және қашан болмайды?

Алыс жарық тасжолдың жарықтандырылмаған бөліктерінде жолды жақсырақ көруге көмектеседі. Бірақ оның айтарлықтай кемшілігі бар: ол қарсы бағыттағы және қатар бара жатқан көлік жүргізушілерінің көзін шағылыстыруы мүмкін.

Сондықтан Жол жүрісі қағидаларында алыс жарықты жақын жарыққа ауыстыру қажет бірнеше жағдай қарастырылған:

Қарсы бағыттағы көлікпен өткенде - қарсы келе жатқан көлікке дейін кемінде 150 метр қалғанда ауысу керек. Егер қарсы келе жатқан машинаның жүргізушісі жарықты ауыстыру қажеттігі туралы белгі берсе, оны бұдан да алыс қашықтықта жасаған жөн. Елді мекендерде - егер жол жарықтандырылған болса, алыс жарықты пайдалануға болмайды. Басқа көліктің артында келе жатқанда - егер алыс жарық айналар арқылы алда келе жатқан машина жүргізушісінің көзін шағылыстыруы мүмкін болса, оны ауыстыру қажет. Басқа жағдайларда, жол қозғалысының басқа қатысушыларының көзін шағылыстыру қаупі болғанда. Мысалы, бұрылысқа немесе өрдің басына жақындағанда, оның артында қарсы бағыттағы көлік болуы мүмкін.

Егер жүргізуші қарсы келе жатқан машинаның алыс жарығынан көзі шағылысып қалса, ереже бойынша апаттық жарық сигналын қосып, қозғалыс жолағын өзгертпестен тоқтауы тиіс.

Тұманға қарсы фаралар: тек тұман үшін емес

Бұл фаралардың атауы адамды жаңылыстыруы мүмкін: оларды тек тұман кезінде ғана пайдалану міндетті емес. Қазақстанның ЖҚЕ-не сәйкес, тұманға қарсы фараларды мына жағдайларда қосуға болады:

көрінуі жеткіліксіз жағдайларда - жеке немесе жақын не алыс жарық фараларымен бірге; түнде жолдың жарықтандырылмаған бөліктерінде - жақын немесе алыс жарықпен бірге; күндізгі уақытта жақын жарықтың орнына, қозғалыстағы көлікті белгілеу қажет болғанда.

Бұл ретте алдыңғы тұманға қарсы фаралар габариттік шамдармен бірге қосылуы тиіс.

Артқы тұманға қарсы шамдарға ерекше назар аударған жөн. Олар көрінуі жеткіліксіз жағдайларға арналған және оларды қажетсіз пайдалануға болмайды: олардың ашық қызыл жарығы артында келе жатқан жүргізушілерге кедергі келтіруі мүмкін.

Габариттік шамдар туралы не білу керек?

Габариттік шамдар автомобильдің көлемін белгілеу және оның жол қозғалысының басқа қатысушыларына көрінуі үшін қажет.

Маңызды жайт: Габариттер күндіз көлік қозғалысы кезінде жақын жарық фараларын немесе күндізгі жүріс шамдарын алмастыра алмайды. Түнде және көрінуі жеткіліксіз жағдайларда қозғалыстағы автомобильде олар негізгі фаралармен бірге қосулы болуы тиіс.

Тәуліктің қараңғы уақытында жолдың жарықтандырылмаған бөлігінде, сондай-ақ көрінуі жеткіліксіз жағдайларда тоқтағанда немесе тұрғанда габариттік шамдарды қосу қажет.

Тағы оқыңыз: Патрульдік көлікті қос тұтас сызық арқылы айналып өтуге бола ма? Талдаймыз

Бізді Google-дың негізгі дереккөздер тізіміне қосыңыз

Қосу