Жазғы маусымда қосымша төрт Тальго пойызы іске қосылады

Жазғы демалыс кезеңінде жолаушылар сұранысының артуына байланысты ұлттық тасымалдаушы қосымша төрт Тальго пойызын жолға шығармақ.

«Жолаушылар тасымалы» АҚ мәліметінше, 18 маусымнан бастап бірнеше бағыт бойынша қосымша пойыздар қатынай бастайды. Атап айтқанда, «Нұрлы жол – Достық», «Алматы-2 – Достық» және «Алматы-2 – Семей» бағыттары қамтылады.

Компания бұл шешімнің негізгі мақсаты өңірлер арасындағы көлік қатынасының қолжетімділігін арттырып, жазғы маусымдағы жолаушылар ағынын реттеу екенін атап өтті.

№254/253 «Нұрлы жол – Достық» бағытындағы Тальго пойызы 22 маусым мен 31 тамыз аралығында аптасына екі рет – дүйсенбі және бейсенбі күндері қатынайды. Құрамында 27 вагон болады және 344 жолаушыға арналған. Оның ішінде мобильдігі төмен азаматтарға арналған арнайы купе де қарастырылған.

Ал №211/212 «Алматы-2 – Достық» пойызы 20 маусым мен 30 тамыз аралығында тақ күндері жолға шығады. Бұл құрамда 23 вагон бар және 326 орын қарастырылған.

№207/208 «Алматы-2 – Достық» бағыты бойынша қосымша пойыз 19 маусымнан 29 тамызға дейін жұп күндері қатынайды. Оның құрамында 22 вагон болып, 288 жолаушыны тасымалдауға мүмкіндік береді.

Сондай-ақ №231/232 «Алматы-2 – Семей» бағыты бойынша Тальго пойызы 18 маусымнан 30 тамызға дейін жұп күндері жүреді. Құрамында 22 вагон бар пойыздың жалпы сыйымдылығы – 288 орын.

Ұлттық тасымалдаушы билеттерді ресми сайт, теміржол кассалары және мобильді сервистер арқылы сатып алуға болатынын хабарлады.

Жолаушылар қосымша ақпаратты 1433 бірыңғай байланыс нөмірі немесе компанияның ресми әлеуметтік желідегі парақшалары арқылы ала алады.