Жер қойнауын пайдаланушылардың жауапкершілігі заңмен күшейтіледі

Бұл туралы Өнеркәсіп және құрылыс вице-министрі Олжас Сапарбеков 2026 жылғы 20 сәуірде өткен Мәжіліс отырысында мәлімдеді.

Вице-министрдің айтуынша, «Өнеркәсіптік саясат туралы» заңға енгізілген өзгерістер аясында ірі тапсырыс берушілер, соның ішінде жер қойнауын пайдаланушылар қазақстандық қамту үлесін арттыру бойынша арнайы бағдарламалар әзірлеп, оны іске асыруға міндетті.

Бұл құжаттар отандық тауарлар мен қызметтердің үлесі бойынша нысаналы көрсеткіштерді белгілеуді, жергілікті өндірушілермен кооперацияны дамытуды және ұзақ мерзімді келісімшарттар жасасуды қарастырады.

Аталған шаралар тұрақты өндірістерді дамытуға, отандық кәсіпорындарды қолдауға және ұлттық экономиканы ынталандыруға бағытталған. Сонымен қатар, қазіргі уақытта бұл міндеттемелерді орындамағаны үшін жауапкершілікті енгізуді көздейтін заңнамалық түзетулер пысықталып жатыр.

Ұсынылып отырған нормаларға сәйкес, бағдарламаларды бекіту талаптарын орындамағаны үшін бірінші жылы сатып алудың жалпы көлемінің 1% мөлшерінде, ал келесі жылдары 3% мөлшерінде айыппұл салынады.

Бұдан бөлек, бағдарламаларды іске асырмағаны үшін орындалмаған міндеттемелер (тауарлар, жұмыстар, қызметтер және офтейк-келісімшарттар) көлемінің 30% мөлшерінде айыппұл қарастырылған. Осындай шара ұзақ мерзімді шарттарды жасасу тәртібін бұзғаны үшін де қолданылатын болады.

Айта кетейік, жер қойнауын зерттеу сапасы жаңа тәртіппен бақыланатынын хабарлаған едік.