Жетісу облысындағы мектеп медпункттері қажетті құралдармен қамтамасыз етілмеген

Жетісу облыстық прокуратурасының мәліметінше, мектептегі медициналық пункттер қажетті дәрілік заттармен және құрал-жабдықтармен жасақталмаған.

— Бірқатар мектептерде оқушылар саны белгіленген нормативтен асса да, штаттық медицина қызметкерлері көзделмеген. Соның салдарынан 3 мыңнан астам бала дер кезінде медициналық көмек алу құқығынан іс жүзінде шектелген, бұл ҚР Конституциясы мен заңнамасының нормаларын тікелей бұзу, — делінген ақпаратта.

Прокуратура мәліметінше, қадағалау актісін қарау нәтижелері бойынша кінәлілер заң бойынша жауапқа тартылған. Тиісті мекемелер бұзушылықтарды жою бойынша шаралар қабылдап жатыр.

— Кәмелетке толмағандардың мүдделерін қорғау және өскелең ұрпақтың денсаулығын сақтау облыс прокуратурасы қызметінің басым бағыттары болып қала береді. Бұл бағыттағы жүйелі жұмыс бұзылған құқықтарды уақтылы қалпына келтіруге және алдағы уақытта мұндай заңбұзушылықтарға жол бермеуді көздейді, — деп қосты ведомство.

Айта кетейік, Павлодар қаласының прокурорлары халыққа медициналық көмек көрсетуге арналған «Әлеуметтік медициналық сақтандыру қоры» КЕАҚ-тың бюджет қаражаты мен активтерінің жұмсалуына жүргізілген тексеру барысында жалған қызмет көрсету фактілерін анықтады.

Сондай-ақ Маңғыстау облысының медицина саласы бойынша 600 млн теңгеден астам жымқыру дерегі анықталды.