Жол битумын сатып алу тәртібін өзгерту ұсынылды

ҚР Энергетика министрі Ерлан Ақкенженов Ақтау қаласындағы «Caspi Bitum» зауытында жол саласына қажетті материалдармен қамтамасыз ету мәселесін талқылады.

Министрдің айтуынша, мердігер ұйымдар битумды көбіне жазда бір мезгілде сатып алады, бұл өндірістік жүктемені арттырып, жөнелту кезегін тудырады.

Негізгі ұсыныс – сатып алудың бір бөлігін қысқы кезеңге ауыстыру. Қыста сұраныс төмен болғандықтан, материалды өндіру мен орау сол уақытта жүргізіліп, кейін ашық алаңда сақталып, жол құрылысы маусымында пайдалануға болады. 

Бұл тәсіл өндірісті біркелкі жүктеуге, қосымша қойма инфрақұрылымына тәуелділікті азайтуға және бюджет қаражатын тиімді жұмсауға мүмкіндік береді.

Зауыттың мүмкіндіктері:

Мұнай өңдеу қуаты жылына 1,5 млн тоннаға дейін артқан.

Жол битумын шығару көлемі – 750 мың тоннаға дейін.

Орташа бағасы – тоннасына шамамен 165 мың теңге.

Полимер-модификацияланған битум өндірісі 200 мың тоннаға дейін жетуі мүмкін. Бұл материал жоғары температураға, ауыр жүктемеге және ауа райының өзгерістеріне төзімді.

Ақтөбе мен Маңғыстау облыстарындағы тәжірибе көрсеткендей, полимерлі битум жол жабындарының сапасын ұзақ уақыт сақтайды.

Сонымен қатар министрлік жол материалдарын өндіру мен қолданудың жаңа технологияларын дамыту үшін ғылыми орталық құруды жоспарлап отыр. Бұл орталық автомобиль жолдарын салуда инновациялық шешімдерді енгізуді жеделдетуге бағытталмақ.

Кеше, 18:44