Жүздеген жәбірленуші және миллиардтаған теңге: Қарағандыда тауар пирамидасы ісі бойынша әйелдер сотталды

Нарықтағыдан төрт есе арзан автокөліктер, жиһаз, тұрмыстық техника, тіпті Түркиядағы пәтер - Қарағандыда клиенттерді осындай ұсыныстар қызықтырған. Соңында 500-ге жуық адам ақшасын төлеген тауарларын ала алмағанын мәлімдеді. Жалпы шығын миллиардтаған теңгені құрайды. Сот алаяқтық схема бойынша үкім шығарды, деп хабарлайды Tengrinews.kz тілшісі.

Ыдыс-аяқтан бастап көлікке дейін су тегін бағамен

Оқиға 2023 жылы Қарағандыда басталған. WhatsApp топтарында Анастасия есімді жас келіншек Қытай, Түркия және Ресейден келетін тауарларды - ыдыс-аяқ, ойыншықтар мен кілемдерден бастап тұрмыстық техникаға дейін ұсынған. Бағалары сатып алушыларды бірден баурап алды: тауарлар нарықтық құнынан үш-төрт есе арзанға сатылады деп уәде етілген.

Уақыт өте келе тауар түрлері көбейді. Чаттарда жиһаз, квадроциклдер, ауыл шаруашылығы техникасы мен автокөліктер пайда болды. Сатып алушыларға шоттар ұсынылып, шарттар жасалған, ал топтарда тапсырыстарын алып қойды делінген адамдардың пікірлері жарияланып тұрған.

Тиімді ұсыныстар клиенттер санын арттыра түсті. Адамдар сауда жасап, сатушыны таныстарына ұсынып, жеткізілімді күткен.

Мәселе тапсырысты алатын мерзім таянғанда басталған. Кейбір сатып алушыларға тауардың шекарада тұрғанын, бірақ оны жеткізу үшін кедендік ресімдеуге немесе басқа да шығындарға қосымша ақша төлеу керектігі айтылған.

Қосымша ақша төлеуден бас тартқандарға тауарды басқа клиентке сатып, бастапқы төлемін қайтаруға уәде берген. Салынған ақшасынан айырылып қалудан қорыққан адамдар қайта төлеуге келіскен.

Алайда көптен күткен заттарының орнына оларға жеткізушілермен, шекарамен немесе бухгалтериямен байланысты мәселелер туралы жаңа сылтаулар айтылған. Ақшасын бәрі бірдей қайтара алмады.

Жәбірленушілердің айтуынша, ұсыныстар тек техника мен көлікпен шектелмеген. Жәбірленушінің бірі сотталушылардың бірі өзіне Түркиядан пәтер сатып алуды ұсынғанын алға тартты. Бірақ ақыр соңында әйел жылжымайтын мүлікті де, ақшасын да көрмеген.

Уәде етілген тауарлар келмейтіні, ал ақшаның қайтарылмайтыны белгілі болғанда, клиенттер полицияға шағымдана бастады.

Жәбірленушілер сот залында. Фото Tengrinews.kz

Қылмыстық іс бойынша 500-ге жуық адам жәбірленуші деп танылды. Көбі көпмиллиондық шығынға батқанын айтса, процесс қатысушыларының мәліметінше, жалпы шығын миллиардтаған теңгені құрайды.

Судья Арғын Құтышев. Фото Tengrinews.kz

Сот алдына алаяқтық схеманы ұйымдастырды деп айыпталған екі әйел келді. Бұған дейін прокурор басты сотталушыға үкімнің орындалуын бір жылға шегере отырып, жеті жылға жуық бас бостандығынан айыру жазасын сұраған болатын.

"Ашық сот отырысында аудио- және бейнетіркеуді қолдана отырып қарап, сот сотталушыларды ҚР ҚК-нің 190-бабы 4-бөлігінің 2-тармағы "Алаяқтық" бойынша қылмыс жасағаны үшін кінәлі деп танып, оларға жазасын қылмыстық-атқару жүйесінің орташа қауіпсіздік мекемесінде өтеумен 6 жыл 8 ай мерзімге бас бостандығынан айыру жазасын тағайындауға, жазаның орындалуын бір жылға, бірақ сотталушылардың балалары 14 жасқа толғаннан кешіктірмей шегеруге үкім етті", - деп судья Арғын Құтышев үкімді жариялады.

Сот үкімі заңды күшіне енген жоқ.

Бұған дейін Tengri TV тілшісі 70-тен астам жәбірленушінің мүддесін қорғайтын заңгермен сөйлескен болатын. Олег Шубенок күмәнді арзан тауарлар сататын чаттар туралы танысынан естігенін айтты.

Тауар берудегі алғашқы мәселелер шамамен 2023 жылдың соңында басталды. Жәбірленушілердің айтуынша, ортақ чаттағы ашулы сатып алушылардың хабарламалары бірден өшіріліп отырған. Сондай-ақ оларды топтан шығарып жібереміз деп қорқытқан. Сол себепті көбі үнсіз қалып, тапсырыстарын аламыз немесе ең болмаса ақшамызды қайтарамыз деп күтіп келген.

Толығырақ бейнематериалдан көріңіз.

Бізді Google-дың негізгі дереккөздер тізіміне қосыңыз