Жылуға жарымай отырмыз...

Egemen.KZ парақшасынан алынған деректерге сүйене отырып, Qazaq24.com жаңалық жариялайды..

Екібастұз қаласындағы 22-шағын ауданның халқы қою түтіннің арасында күн кешуге мәжбүр. Мыңға тарта тұрғын баспанасын орталық жылу желісіне қосып беруді сұрағалы он жылдай уақыт өткен. Өкінішке қарай, жұрттың бұл арманы әзірге орындалмайтындай.

Шағын аудан Екібастұз қаласының шеткері бөлігінде, 23, 25, 26-шағын аудандармен жапсарлас орналасқан. Мұндағы баспаналардың барлығы – жер үйлер. Жаңа аудан ретінде 2008 жылы салына бастап, арада жеті жыл өткенде барлық жер телімдерінде құрылыстар толықтай бой көтерген. Үй иелері баспаналарын пеш жағып жылытады. Қысқы мезгілде үйлер бұрқыраған қою түтінге көміліп, ащы ыстың иісі есік-терезеден кіреді. Тұрғындар көшеге шығып, серуендейін десе, ауадағы көмірқышқыл газын жұтуға мәжбүр. Жұртшылық үйлерінің дәл жанынан өтетін орталық жылу магистраліне қосыла алмай отыр. Себебі көшелерге жылу құбыры жүргізілмеген.

– 2010 жылы үйімізді салып, көшіп келдік. Қара күзден көктемге дейін үзбей пеш жағамыз. Күйеуім екеуіміз жұмыстамыз, үйде ұлым ғана. Ол пеш жаға алмайды. Кейде аңыраған суық бөлмеде бізді кешке дейін күтіп отыруға мәжбүр. Айналамыздағы жер үйлердің көбі ұзақ жанатын пеш қойып алған. Құрылғылар қауіпсіздік талаптарына сай емес. Жалпы, ауданда өрт көп, 2023 жылы біздің көшеде бір үй отқа оранып, ішінде кішкентай бала қалып қоя жаздады. Одан кейін дүкен мен монша өртеніп кетті. Тағы екі баспана толығымен күлге айналса, бірнеше үйдің жанында бөлек шығарылған пештері жарылды. Әрбір оқиға – өмірімізге үлкен қауіп. Орталық жылу құбыры дәл жанымыздан өтсе де, соған қосыла алмай отырғанымыз өкінішті. Кейде жел бағыты өзгергенде одан ұшқан түтін мен шаң-тозаң борап, үйден шығудан қаламыз. Бір қыста шамамен 100-150 мың теңгенің көмірін жағамыз. Ондай шығынды біз сияқты қарапайым адамдардың қалтасы көтере бермейді. Мұнда жалғызбасты қарт адамдар мен көпбалалы отбасылар тұрып жатыр. Олардың жағдайын ойлап отырған ешкім жоқ, – деп қынжылады Петренко көшесінде тұратын Дана Әмірова.

Үйлерін орталық жылу желісіне қосып беруді сұраған көпшілік 2017 жылдан бері әкімдікке, тиісті органдарға хат жазумен келеді. Әкімнің есептік кездесулерінде де жиі көтерілетін мәселенің біріне айналған. Алайда биліктің сырғыма жауабы жергілікті тұрғындарды қанағаттандырмай отыр.

Бір қызығы, бұл аумақтан кейін бой көтерген 23-шағын аудандағы барлық жеке үйлер орталық жылуға қосылған. Тұрғындардың айтуынша, осы орайда билік пен жылуға жауапты кәсіпорын 22-шағын ауданды неліктен елемей отырғаны түсініксіз.

Зейнеткер Сағила Қырықбесова «2023 жылы 22-шағын ауданға жылу құбыры тартылады» деген биліктің сөзіне сеніп, отбасымен көшіп келгенін жеткізді. Алайда арада үш жылдай уақыт өтсе де, уәде орындалмаған. Ұзақ жылғы бейнетінің зейнетін көретін шаққа жеткенде де қиындықтан көз ашпай, күні бойы үйіне шелектеп көмір тасып, пеш жағумен өмірін өткізіп келеді.

– Былтыр күзде үйімізден шығарылған күлдің шоғы желмен ұшып, гаражымыз өртке оранды. Абырой болғанда өрт сөндірушілер жедел жетіп, сөндіріп алды. Көшелерде орталық кәріз жүйесі бар, бірақ оны жағдайы жететін тұрғындар ғана тартып алған. Кейбір үйлер әлі күнге жеке септикті пайдаланады. Бұл да үлкен мәселенің бірі. Бұдан бөлек, көшелерде әлі күнге асфальт төселмеген, ол жылу құбыры жүргізілген соң пайда болады деп отыр биліктің адамдары. Көктемде қар ерігенде толарсақтан саз кешеміз. Жылу құбыры тіпті айдаладағы ипподромға дейін салынып тасталған. Ол құбырларға жылу барып тұрса да, жерге көміліп бостан-бос жатыр. Ортада шарасыз күйде қалып отырмыз, – деп мұңын шақты зейнеткер.

Мәселенің ізімен Екібастұз қаласы әкімдігіне хабарластық. Әкімдіктің дерегінше, аталған шағын ауданда 45 екі қабатты, 216 бір қабатты жеке тұрғын үй орналасқан. Шамамен мыңнан астам тұрғын тіршілік етеді. Қолданыстағы желілерде қысым параметрлері жеткіліксіз болуына байланысты аумақты орталық жылу магистраліне қосуға мүмкіндік жоқ көрінеді.

– Ауданға жылу тартуға жобалау-сметалық құжаттама (ЖСҚ) әзірлеу мүмкін болмады. Дегенмен 2024 жылы ТМ 7/1 қосымша жылу магистралі салынғаннан кейін жобаны іске асыруға жол ашылды. 2025 жылы 22-шағын ауданның жылу желілерінің жобасын әзірлеуге техникалық шарттар алынды. Қазір ЖСҚ әзірлеу жөніндегі жұмыс жүргізіліп жатыр. Аудандағы жылу құбырларының жалпы ұзындығы – 4 километр. ЖСҚ биыл маусым айына дейін әзірленіп болуы керек. Ал әзірге аумақ тұрғындарына шыдай тұруға тура келеді. Атап өтерлігі, мұндағы осал топтардың жағдайы – біздің назарымызда. «Богатырь Көмір» ЖШС жыл сайын қайырымдылық көмек ретінде пешпен жылытылатын үйлердің тұрғындарына (әлеуметтік жағдайы төмен) тегін көмір үлестіреді, – дейді Екібастұз қаласы әкімінің орынбасары Қаныш Әділжанов.

Оның сөзінше, негізі Екібастұз қаласында жылу желілерінің құрылысы кезең-кезеңімен жүргізіліп келеді. 2019–2021 жылдар аралығында 23-шағын ауданның, ипподром ауданының жылу желілерін салу жөнінде жалпы құны 2,2 млн теңге болатын екі жоба іске асырылған. Нәтижесінде, қазір қаладағы орталық жылумен қамтылған жер үйлердің саны 6,5 мыңға жетіп отыр. Алайда 22-шағын аудандағы жер үйлерге құбыр тартуға қаражаттың қашан, қандай көлемде бөлінетінін билік өкілдері айта алмады.

Экономикасы алға озған, көмірімен әйгілі индустриалды шаһардың халқы осылайша әлі күнге қыстың қыспағында пеш жағып, бой жылытып отырғаны жергілікті биліктегілерді ойландыруға тиіс. 2022 жылдың қысында Екібастұздың елеулі бөлігін жылусыз қалдырған адам айтқысыз апатты да ешкім ұмыта қойған жоқ. Коммуналдық желілерді халық игілігіне барынша пайдалануға маңыз берілмесе, ортақ игіліктің құны жоқ.

Павлодар облысы,

Екібастұз қаласы

Соңғы жаңалықтар