Әлемде 3 миллиардтан астам адам жүйке жүйесінің ауруларына шалдыққан

Әлем халқының 40 пайызынан астамы (3 миллиардтан астам адам) жүйке жүйесінің түрлі  ауруларынан және ауытқуларынан зардап шегіп отыр. Бұл аурулар жыл сайын шамамен 11 миллион адамның өмірін қияды. Мұндай деректер Дүниежүзілік денсаулық сақтау ұйымының сайтына жария болған зерттеуде айтылған. 

"2021 жылы өлімге және мүгедектікке әкелетін негізгі 10 неврологиялық аурудың қатарына инсульт, неонаталдық энцефалопатия, бас сақинасы, Альцгеймер ауруы, деменция, диабеттік нейропатия, менингит, идиопатиялық эпилепсия, шала туған балалардың неврологиялық асқынулары, аутизм мен жүйке жүйесінің онкологиялық аурулары енді. Бұл аурулар әсіресе дамуы тұралаған елдерге ауыр соққы. Өйткені, оларда бұл сала дәрігерлерінің саны дамыған елдермен салыстырғанда 82 есе аз", – делінген зерттеуде. 

ДДСҰ денсаулық сақтау жөніндегі бас директорының көмекшісі Джереми Фаррардың айтуынша, зерттеу нәтижесін негізге ала отырып ми саулығына көбірек көңіл бөлу және медициналық көмекті әлем халқының бәріне бірдей көрсету қажет. 

"Әлем халқының үштен бірі ми қызметіне әсер ететін ауруларға шалдыққан. Бұл аурулардың көпшілігінің алдын алуға және тиімді емдеуге болады. Алайда науқас саны тым көп және ауылдық елді мекен тұрғындарында сапалы көмек қолжетімді емес. Біз науқастар мен олардың отбасыларының мүддесін бірінші орынға қоюымыз қажет", – деді ол.

Зерттеу нәтижесіне сәйкес, тек 63 мемлекетте (32 пайыз) неврологиялық аурулардың алдын алу және емдеу саясаты қабылдағаны анықталған. Оның ішінде 34 ел ғана бұл салаға қаржы бөледі. 

"Көптеген елде невролог мамандардың жетіспеушілігі, медициналық ақпарат жүйелерінің әлсіздігі және ғылыми зерттеулердің жеткіліксіз қаржыландырылуы салдарынан науқастар уақтылы диагностика мен ем ала алмай отыр. Сонымен қатар, науқастарға күтім жасайтын адамдардың еңбегі көп жағдайда ресми танылмайды және қаржылай қолдау таппайды", – делінген зерттеу қорытындысында.