Әлемде жастар арасындағы жұмыссыздық 12 пайызға дейін артты

Әлемде жастар арасындағы жұмыссыздық деңгейі өсіп келеді. Экономикалық өсімнің баяулауы және жаңа жұмыс орындарының аз құрылуы жастардың еңбек нарығына шығуын қиындатып отыр. Бұл туралы Халықаралық еңбек ұйымының "Жастардың жұмыспен қамтылуының жаһандық үрдістері – 2026: Болашаққа оралу" атты баяндамасында айтылған.

Зерттеуге сәйкес, 2025 жылы әлемдегі жастар арасындағы жұмыссыздық деңгейі 12,4%-ға жеткен. Қазір 15-24 жас аралығындағы 67 миллион адам жұмыссыз.

Жұмыссыздықтың ең жоғары өсімі табыс деңгейі жоғары елдерде байқалған. Жалпы, 2023-2025 жылдар аралығында әлемнің 11 субөңірінің сегізінде жастар арасындағы жұмыссыздық өскен.

Халықаралық еңбек ұйымының мәліметінше, экономикалық өсімнің баяулауы, жұмыс орындарының жеткіліксіз құрылуы, геосаяси шиеленістер және технологиялық өзгерістер жастардың жұмыспен қамтылуына қосымша қауіп төндіреді. Сонымен қатар жастар үшін еңбек нарығына алғаш кіруге мүмкіндік берген кеңсе және әкімшілік қызметтер, сауда мен қызмет көрсету салаларындағы, сондай-ақ өңдеу өнеркәсібі мен кейбір техникалық мамандықтардағы жұмыс орындары қысқарып келеді.

Дамушы елдерде жастар санының өсуіне байланысты лайықты жұмыс орындарын жеткілікті көлемде құру мәселесі әлі де өзекті. Төмен және ортадан төмен табысты елдерде 15-29 жастағы жас жұмысшылардың шамамен 90 пайызы бейресми секторда еңбек етеді. Бұл олардың тұрақты табыс пен әлеуметтік қорғауға қол жеткізуін шектейді.

Баяндамада жасанды интеллектіні қоса алғанда, технологиялық өзгерістердің еңбек нарығына ықпалы күшейіп келе жатқаны айтылған. 15-29 жастағы жастар атқаратын жұмыс орындарының 6,1%-ы жасанды интеллект әсерінен елеулі өзгерістерге ұшырауы мүмкін мамандықтарға жатады.

Сонымен бірге ғылым, денсаулық сақтау және инженерия сияқты салаларда білімі мен біліктілігі жоғары мамандарға сұраныс артып келеді.