Қазақстанда әрбір 10 12 минут сайын бір адам инсульт алады дәрігерлер

Қазақстанда жыл сайын 50 мыңға жуық адам инсульт алады. Бұл статистиканың артында өмір салты мен тамақтану ерекшеліктеріне байланысты туындайтын семіздік дерті тұр. Дәрігерлердің айтуынша, соңғы онжылдықта Қазақстанда семіздіктің таралуы айтарлықтай артып, аурудың "жасару" үрдісі байқалуда. Алматыда өткен дөңгелек үстел барысында жетекші невролог, кардиологтар мен халықаралық сарапшылар метаболикалық бұзылыстардың адам ағзасына, соның ішінде жүйке және жүрек-қан тамырлары жүйесіне тигізетін жойқын әсерін талқылады. Мамандардың пікірінше, бұл мәселемен күрес денсаулық сақтау жүйесінің басымдығына айналуы тиіс.

Денсаулық сақтау министрлігінің штаттан тыс бас неврологы, медицина ғылымдарының докторы Сәуле Тұрысбекова метаболикалық бұзылыстардың жүйке жүйесіне әсері туралы баяндады. Маманның айтуынша, семіздік инсульт пен когнитивті бұзылыстардың қаупін айтарлықтай арттырады, бұл халықтың ерте мүгедектікке ұшырауының бір себебіне айналып отыр.

"Қазақстанда жыл сайын 40-49 мың инсульт жағдайы тіркеледі, яғни әрбір 10-12 минут сайын біреу инсульт алады. Семіздік ми тамырларына, артериялық гипертензияға және қант диабетінің дамуына әсер етеді. Зерттеулер көрсеткендей, артық салмақ инсульт қаупін шамамен 50 пайызға арттырады", – деп баса айтты Сәуле Тұрысбекова.

Кардиолог, медицина ғылымдарының кандидаты, Алматы қаласының штаттан тыс бас терапеві Дина Қапсұлтанова семіздіктің жүрек-қан тамырлары ауруларымен – елдегі өлім-жітімнің негізгі себебімен тікелей байланысты екенін атап өтті.

Оқи отырыңыз: Генетика ма, күйзеліс пе? Трихолог жастардың шашы неге ерте ағарып жатқанын түсіндірді

"Семіздік – бұл эстетикалық мәселе емес, бұл біздің ұлтымыздың аман қалу мәселесі. Жүрек-қан тамырлары аурулары әлемде де, Қазақстанда да өлім-жітімнің басты себебі болып қала береді, ал артық салмақ – негізгі қауіп факторларының бірі", – деді ол.

Герофарм компаниясының Қазақстандағы өкілдігінің директоры Людмила Воронова халықаралық тәжірибе мен жүйелі бастамалар туралы айтты. Ол көптеген елде семіздікпен күресу бойынша ұлттық бағдарламалар қалыптасып жатқанын, компанияның мұндай әзірлемелерге белсенді қатысуға және өз сараптамасымен бөлісуге дайын екенін жеткізді.

"Соңғы онжылдықта әлемде және Қазақстанда семіздіктің таралуы айтарлықтай өсті. Мамандардың айтуынша, мәселе "жасарып" барады – метаболикалық бұзылыстар еңбекке қабілетті жастағы адамдарда, тіпті балаларда жиі анықталуда. Бұл өмір салтының өзгеруіне, физикалық белсенділіктің төмендеуіне және заманауи тамақтану ерекшеліктеріне байланысты", – деді Людмила Воронова.

Дөңгелек үстел қатысушылары семіздікпен күрес денсаулық сақтау жүйесінің басымдықтарының біріне айналуы тиіс деген қорытындыға келді.

Оқи отырыңыз: "Үнсіз келетін сырқат": Бүйрек аурулары неге қауіпті және одан қалай қорғану керек