Қазпошта 2017 жылдан бері газет журнал таратуға субсидия алады. Бірақ, неге оқырман шағымы көп

"Қазпошта" АҚ басқарма төрағасы Бекежан Жәкеев мәжіліс депутаты Ермұрат Бапидің өңірлердегі оқырмандарға газет-журналдың кешігіп жетуіне қатысты қойған сауалына жауап берді. 

Айта кету керек, "Қазпошта" АҚ 2017 жылдан бері газет-журналдарды таратуға мемлекеттен субсидия алады. Бірақ, Жәкеевтің айтуынша, бұл мемлекеттік көмек компанияның бұл қызметті жүзеге асыру шығындарын өтемейді. Жыл санап субсидия мөлшері азайып жатса, шығындар көлемі керісінше өсіп келеді. 

Мәселен, 2021 жылы ауылдық елді мекендерде мерзімді баспасөз басылымдарын тарату қызметтерін көрсетуден Қазпоштаның шығыны 7,2 млрд теңгені құраса, содан бері тұрақты түрде өсіп, 2024 жылғы шығын 10,4 млрд теңге болған. 

"Қазпошта аптасына кемінде екі рет ауылдық елді мекендерге баспа басылымдарын жеткізуді жүзеге асырады. Осы параметрлердің орындалуын уәкілетті орган тоқсан сайын бақылайды. Республика бойынша баспа өнімдерін жеткізу көлемі күн сайын 160 мыңнан астам дананы құрайды. Газет-журнал өнімдерін тарату, жөнелту және жеткізу процесін ұйымдастыру үшін Қазпошта айтарлықтай шығындарға ұшырайды", – деді Бекежан Жәкеев. 

Компания басшысының сөзінше, 2017 жылдан бастап ұсынылып келе жатқан субсидиялар газет/журналдарды тарату бойынша Қазпоштаның нақты шығындарын өтемейді. Ал жыл сайын субсидиялардың қысқаруы және төмен тарифтер Қазпошта үшін әлеуметтік маңызы бар қызметтерді көрсетудің тиімсіздігіне әкеліп соғады.

"Өткен жылдары жиналып қалған шығынды Қазпошта басқа қызмет түрлерінен түскен табыстармен жабуға мәжбүр, нәтижесінде компанияның бүкіл қызметі бойынша теріс қаржылық нәтиже қалыптасады. Қызметтердің шығындылығына қарамастан, Қазпошта Әмбебап пошта байланысы қызметтерінің сапа көрсеткіштеріне сәйкес, ауылдық елді мекендерде мерзімді баспасөз басылымдарын тарату бойынша өзіне жүктелген міндеттемелерді орындау бойынша жан-жақты шаралар қабылдайды", – делінген Бекежан Жәкеевтің жауабында.