Қой ешкі мен ірі қара терісін өңдейтіндер мемлекеттен субсидия ала алады

Қазақстанда малдың жүн, тері сынды қосалқы өнімдерін өңдеумен айналысатын кәсіпорындарды қолдау мақсатында мемлекеттік субсидия беру мәселесі қаралып жатыр. Бұл туралы үкімет басшысының орынбасары Серік Жұманғариннің мәжіліс депутаттарының сауалына берген жауабында айтылған. 

Субсидия беруден бөлек, инвесторларға салық жеңілдіктерін ұсыну мәселесі де қарастырылады.  

"2027 жылға дейін АӨК-де инвестициялық жобаларды іске асыру жөніндегі жол картасы бекітілді, оның шеңберінде жалпы сомасы 7,6 млрд теңгеге ауыл шаруашылығы жануарларының терісі мен жүнін қайта өңдеу жөніндегі үш жобаны іске асыру көзделген. Қайта өңдеу кәсіпорындарын шикізатпен қамтамасыз ету мақсатында асыл тұқымды мал шаруашылығын дамытуды, мал шаруашылығы өнімінің өнімділігі мен сапасын арттыруды субсидиялау қағидаларына өзгерістер енгізілді. Қайта өңдеуге тапсырған кезде субсидияланатын ауыл шаруашылығы өнімдерінің тізбесі кеңейтілді", – делінген Серік Жұманғариннің жауабында. 

Сондай-ақ, үкімет өкілі ауыл шаруашылығы жануарларының терісін қайта өңдеу кәсіпорындарын салуға және жаңғыртуға инвестицияларды ынталандыру үшін инвестициялық салымдарды жүзеге асыру кезінде АӨК субъектілері шығындарының бір бөлігін өтеуді субсидиялау қағидаларында инвестициялық шығындардың жалпы сомасының 25 пайызын өтеу көзделгенін атап өтті. 

"Бұдан басқа, былғарыдан және жүннен жасалған өңделген өнім АӨК субъектілеріне кредит беру кезінде, сондай-ақ ауыл шаруашылығы жануарларын, техника мен технологиялық жабдықтарды сатып алуға кредиттер мен қаржы лизингін беру кезінде пайыздық мөлшерлемелерді субсидиялау көзделген тауарлар тізбесіне енгізілген. Агроөнеркәсіптік кешендегі жобаларға кредит беру қағидаларында жүн мен теріні терең өңдеу жөніндегі жобаларды қаржыландыру көзделген", – деді Серік Жұманғарин.