"Бюрократияға әкеледі". Бектенов банк ақпаратын тек сот шешімімен беру туралы ұсынысты қолдамады

Үкімет басшысы Олжас Бектенов мәжіліс депутаты Серік Ерубаевтың банк ақпаратын тек сот шешімімен немесе құзырлы органдардың дәлелде талаптарымен ғана беру туралы ұсынысына жауап берді. Бұл ретте премьер-министр депутаттың бұл жағдай азаматтардың банк жүйесіне деген сенімі әлсіреп, бизнестің жаппай "көлеңкелі экономикаға" бет бұратыны туралы уәжіне келіспейді. Ол халықаралық тәжірибені алға тартты. 

"Әлемдік тәжірибеде көптеген мемлекеттер (АҚШ, Франция, Германия, Ресей, Қытай, Беларусь, Өзбекстан, Қырғызстан, Армения және т.б.) салық органдарына сұрау салу бойынша немесе автоматты режимде банктік ақпарат алуға рұқсат береді. Халықаралық тәжірибеге сүйенсек, салық органдарының банктік мәліметтерге қолжетімділігі неғұрлым кең әрі жедел болса, көлеңкелі экономика деңгейі соғұрлым төмен және салық тәртібі жоғары болады. Мәселен, Францияда банк шоттары, қалдық пайыздар және дивидендтер туралы автоматты есеп беру енгізілген соң салық төлемеу жағдайларының анықталуы 5 жылда 3 есе өсті, көлеңкелі экономика ішкі жалпы өнімнің 10-11%-ын құрайды және Еуропалық одақ елдеріндегі ең төмен көрсеткіштердің бірі болып саналады", – делінген Олжас Бектеновтің жауабында. 

Премьер-министр Қазақстанда мемлекеттік кірістер органдары банк ұйымдарынан Қазақстан Республикасының қолданыстағы заңнамасының нормаларына сәйкес сұрау салу бойынша ақпарат аладытынын еске салды Мемлекеттік кірістер органдарына салықтар мен төлемдердің бюджетке түсуінің толықтығы мен уақтылығын қамтамасыз ету жөніндегі міндеттер жүктелген. 

"Ақпаратты сот шешімі бойынша беру қажетті ақпаратты алу мерзімдерін кешіктіруге, бюрократияға, мемлекеттік кірістер органдарына жүктелген міндеттерді орындау үшін қосымша әкімшілік тосқауылға, мемлекеттік бюджетке түсетін түсімдерді азайтуға, көлеңкелі экономика деңгейін арттыруға, сондай-ақ сот органдарының жүктемесін ұлғайтуға әкеп соғады", – деп қорытындылады Олжас Бектенов.