3 қарашада "Наурыз" ипотекасына өтініш беру басталды. Төмен пайызбен үй алу жолын түсіндіреміз

Бүгін, 3 қарашадан бастап 1 желтоқсан аралығында "Наурыз" және "Наурыз Жұмыскер" ипотекалық бағдарламалары бойынша өтінім қабылданады. Бұл жолғы қабылдауға көктемгі іріктеуден өтпеген азаматтар да қатыса алады. 

Осы орайда Информбюро порталы бағдарламаның негізгі шарттары мен қалай қатысуға болатынын түсіндіреді.

№1. Кімдер қатыса алады? Отбасы банкінің барлық салымшылары; Депозиті бар және шотында кемінде 2 млн теңге жинағы бар клиенттер; Кейінгі бес жылда өзінде де, отбасында да үйі болмаған азаматтар.

№2. Қатысушыларға қандай талаптар қойылады? Қазақстан азаматтығы немесе Қандас мәртебесі болуы керек; Өтініш берген кезде қатысушының жасы 18-ден 63 жасқа дейін (қоса алғанда) болуы керек; Кейінгі 6 ай ішінде ресми табысының болуы; Бір салымшы не отбасы бағдарлама шеңберінде тұрғын үйді бір реттен артық сатып ала алмайды; Бағдарламаға ерлі-зайыптылардың біреуі ғана қатыса алады; Бағдарламаға қатыушылар тізімінің ашықтығы үшін бағдарламаға қатысқаны және заем алғаны туралы ақпаратты банктің ресми сайтында орналастыруға келісім беруі керек.

№3. Ипотека шарттары қандай?

Бастапқы жарна:

таза әрленген бастапқы тұрғын үй үшін – 10%-дан бастап; әрленбеген бастапқы немесе қайталама тұрғын үй үшін – 20%-дан бастап.

Сыйақы мөлшерлемесі:

7% (ЖТСМ 7,1 %-дан) – әлеуметтік осал топтарға; 9 % (ЖТСМ 9,4 %-дан) – барлық қатысушыларға.

Ең жоғары несиелеу сомасы:

30 млн теңге – өңірлерде; 36 млн теңге – Астана мен Алматыда

Несиелеу мерзімі – 19 жылға дейін.

№4. Ресми табысқа не жатады?

Кірістерге:

еңбек қызметінен түскен жалақы; кәсіпкерліктен түскен пайда; ақылы қызмет көрсету шарты бойынша түскен табыс; жәрдемақылар; стипендия; тұрғын үй төлемдері кіреді.

Бағдарламаға қатысушының табысы жеткіліксіз болса, онда ол кепілгер болатын екі қарыз алушыны тарта алады. Кепілгерлердің туыс болуы міндет емес.

№5. Отбасы мүшелері деп кімдер есептеледі?

Банк кейінгі 5 жыл ішінде бағдарламаға қатысушының және оның отбасы мүшелерінің меншігінде тұрғын үйдің болмауын және тұрғын үймен жасалатылған операциялардың болмауын тексереді. Отбасы мүшелеріне күйеуі, әйелі және олардың кәмелетке толмаған балалары жатады.

Қатысушы некеде тұрмаса онда тұрғын үйдің бар-жоқтығы тек өзінен тексеріледі. Бағдарламаға қатысушылардың ата-аналасынан тұрғын үйдің бар-жоғын тексермейді.

№6. Қатысушылар қалай іріктеледі?

Балл бойынша былай есептеледі:

халықтың әлеуметтік осал тобынан шықса – 10 балл; 18 жасқа толмаған балалары болса (саны маңызды емес) – 10 балл; некеде болса (некеде тұрған жылы маңызды емес) – 5 балл; қатысушының жасы 35 жасқа дейін (қоса алғанда) болса – 5 балл; салым бойынша сыйақы мөлшерінің көлеміне қарай, әрбір 1 000 теңге үшін – 1 балл.

№7. Депозит ашқан уақыт ескеріле ме?

Жоқ, депозитті қай уақытта ашқаныңыз, қанша уақыт ақша жинағаныңыз ескерілмейді. Бастысы Отбасы банкінде депозит ашып, өтінім берер алдында кемінде 2 млн теңге болуы қажет. 

"Табысты", "Жинақ", "Арнау" тарифтік бағдарламалары шеңберінде ашылған депозиттер қарастырылмайды. Сондай-ақ, үміткер бұрын "Кейіннен сатып алу мүмкіндігімен жалға алу" және "Отау" секілді өзге тұрғын үй бағдарламаларына қатыспауы керек.

№8. Қалай өтінім береді?

Baspana Market сайтына кіріп өтінім беру керек. Ол үшін:

Сайтта тіркеліп, жеке кабинетке кіріп, "Менің өтінімдерім" бөлімінде "Наурыз" бағдарламасын тауып, "Өтінім жіберу" түймесін басасыз; Бағдарлама шарттарымен танысып, үй сатып алғыңыз келетін аймақты және өтініш берген кезде тұрып жатқан аймақты таңдайсыз. Шарттарды оқығаныңызды растап, "Жалғастыру" түймесін басасыз; Бағдарламаға қатысатын депозитті көрсетіп, шарттармен келісеіз. Растау үшін телефон нөміріңізге SMS келеді; Өзіңіз туралы мәліметті тексеріп, жалғастырасыз; Әрі қарай үш жұмыс күні ішінде мемлекеттік деректер базасынан сізде (жұбайыңызда) баспананың бар-жоғы тексеріледі. Одан кейін банк мүлікті тексереді; Тексеру сәтті аяқталса, "Растау" түймесін басу қажет. Сол кезде атыңызда жылжымайтын мүліктің жоқтығы туралы хабарлама келеді. "Жалғастыру" түймесін басасыз; Ашылған терезедегі барлық шартпен танысып, ЭЦҚ қол қоясыз және "Жалғастыру" түймесін басып, өтініш жібересіз. Енді нәтижесін күтсеңіз болды.

№9. Сатып алатын үйлерге қандай талап қойылады?

Пәтерді Baspana Market порталынан таңдап, брондап, сатып ала алады. 

Астана, Алматы және облыс орталықтарында тек құрылыс компанияларынан жаңа тұрғын үй сатып алуға болады. Ал қалған өңірлерде кез келген тұрғын үйді, соның ішінде екінші нарықтағы пәтерлер мен жеке үйлерді сатып алуға мүмкіндік бар.

Сондай-ақ, жаңа үйді жөндеу жұмыстарына да ақша алуға болады. Бастысы оның сомасы тұрғын үй сатып алуға арналған кредиттің 20%-нан аспауға тиіс.