"Үлкен үміт күткен едік". Ақтөбеде 15 жасар футболшы көз жұмды

Ақтөбеде 15 жастағы футболшы Арон Мұса көз жұмды. Жас спортшымен бірге бауыры мен әжесі де ажал құшқан. Болжам бойынша, бүтін бір отбасының мүшелері газдан уланған. Қазір Ақтөбе облысының полиция департаменті қайғылы оқиға бойынша тергеу жүргізіп жатыр, деп хабарлады 31 арнаның Информбюро ақпараттық бағдарламасы. 

Төтенше жағдайлар департаментінің мәліметінше, үйден өрт шықпаған. Тек таңертең баспана ішінен үш адамның денесі табылған. Газ құрылғыларына техникалық сараптама тағайындалды. Сонымен қатар, мамандар сот-медициналық зерттеу арқылы нақты өлім себебін анықтамақ.

Марқұм Арон Мұса болашағынан зор үміт күттірген жас ойыншылардың бірі болған. Ол небәрі 6 жасында клуб академиясына қабылданып, еңбекқорлығымен көзге түсіпті. Жастардың "QJ" лига командасына қабылданып, өз командасының оң жақ қапталдағы қорғаушысы болған. Клуб басшылығы мен жаттықтырушылар Аронның отбасына қайғыра көңіл айтып, қаржылай қолдау көрсететіндерін жеткізді.

"Үлкен үміт күттірген қорғаушы еді. Арон болашақта "Ақтөбе" футбол клубының негізгі командасында ойнайды деп ойлаушы едік. Сол таңдаудан өткен ойыншылардың бірі. Өкінішке қарай, мезгілсіз өмірден өтіп кетті. "Ақтөбе" футбол клубы Арон Мұсаның жанұясына қаржылай көмек көрсетеді", – деді "Ақтөбе" ФК медиа-офицері Әсет Жомарт.