Сорбұлақтың суы пайдалануға жарай ма? Зерттеу 2026 жылғы сәуірде аяқталады

Премьер-министр Олжас Бектенов мәжіліс депутаттарының Сорбұлақтың суын, құрамын және деңгейін тексеретін мемлекеттік комиссия құру туралы ұсынысына жауап берді. 

Үкімет басшысының жауабына сәйкес, Денсаулық сақтау министрлігі 2024 жылы Сорбұлақ жинақтауышынан микробиологиялық көрсеткіштер бойынша, паразитологиялық көрсеткіштер бойынша және пестицидтер бойынша су сынамаларын зерттеді. Сынамалар кейбір көрсеткіштерге, оның ішінде микробиологиялық көрсеткіштер мен паразитологиялық көрсеткіштерге сәйкес келмеді. Сонымен қатар 2025 жылдың бірінші жартыжылдығында топырақтың вирусологиялық көрсеткіштері бойынша 2 сынама зерттеліп, сәйкессіздік анықталмаған. 

"Бұл ретте Экология және табиғи ресурстар министрлігі тазарту жұмыстары өткізілгеннен кейін және тиісті гигиеналық нормативтер мен паразитологиялық көрсеткіштердің сәйкестігіне қол жеткізілгеннен кейін ғана жинақтауыштың суын пайдалануға болатыны Алматы қаласы әкімдігінің назарына жеткізілгенін хабарлайды (суды пайдалану қоршаған орта мен халық денсаулығына ұзақ мерзімді теріс салдарға әкелуі мүмкін). Жоғарыда аталған факторлардың негізінде инженерлік инфрақұрылымды қайта зерттей отырып, гидрогеологиялық және геологиялық зерттеулер жүргізу туралы шешім қабылданды", – делінген премьер-министрдің жауабында. 

Зерттеу жұмыстарын жүргізу үшін қала бюджетінен 120 млн теңге қаражат бөлінген. Зерттеу жұмыстары 2026 жылғы сәуірде аяқталады.