2027 жылы Астанада УЕФА конгресі өтеді

АСТАНА, 5 тамыз – Sputnik. Астанада УЕФА-ның 51-конгресі өтеді, деп хабарлады Туризм және спорт министрлігі

Еуропа футболының алдағы жылдардағы даму бағытын айқындайтын ауқымды іс-шара 2027 жылдың 22 сәуіріне белгіленген.

Конгреске УЕФА құрамына кіретін 55 ұлттық футбол қауымдастығының өкілдері, ұйым президенті, Атқарушы комитет мүшелері, ФИФА, еуропалық лигалар, клубтық бірлестіктер және халықаралық спорт ұйымдарының өкілдері қатысады.

"Алдағы конгрестің басты ерекшеліктерінің бірі – сайлау рәсімінің өтуі. Дәл осы Астанада УЕФА президенті мен Атқарушы комитет мүшелері сайланады", - деп жазылған хабарламада.

Конгресті ұйымдастыруға байланысты барлық шығынды УЕФА өз қаражаты есебінен қаржыландырады.

Еске салсақ, 4 тамызда Францияның "Пари Сен-Жермен" футбол клубы Қазақстанда өзінің ресми академиясын ашатынын жариялады. Әлемдік футболдағы жетекші брендтердің бірінің елімізге келуі балалар мен жасөспірімдер футболын дамытуға, заманауи даярлық әдістемелерін енгізуге және халықаралық тәжірибе алмасуға мүмкіндік береді.