75 млн теңгеге дейін: жаңа ипотеканың шарттары қандай?

Қазақстанда салынып жатқан тұрғын үй кешендерінен пәтер сатып алуға арналған «Орда Аймақ Плюс» атты жаңа өңірлік ипотекалық бағдарлама іске қосылды.
Бағдарламаның операторы – Қазақстан тұрғын үй компаниясы. Бағдарлама аясында тұрғын үйді жылдық 10,9 пайыздан басталатын мөлшерлемемен рәсімдеуге болады.

Ипотеканың негізгі шарттарына сәйкес, сыйақы мөлшерлемесі жылдық 10,9–14,9 пайыз аралығында белгіленген. Жылдық тиімді сыйақы мөлшерлемесі (ЖТСМ) 11,7–16,2 пайызды құрайды.

Бастапқы жарна тұрғын үй құнының кемінде 20 пайызынан басталады. Несие сомасы 75 млн теңгеге дейін беріліп, өтеу мерзімі 20 жылға дейін қарастырылған.

Бағдарлама талаптарына сәйкес, қоса қарыз алушыларды тартуға мүмкіндік бар. Сонымен қатар қосымша кепіл талап етілмейді — кепіл ретінде ипотека арқылы сатып алынатын пәтердің өзі рәсімделеді.

«Орда Аймақ Плюс» бағдарламасы Қазақстан тұрғын үй компаниясы кепілдік берген өңірлердегі жаңа тұрғын үй кешендеріне арналған. Қазіргі уақытта бағдарлама арқылы Өскемен қаласындағы «Престиж» тұрғын үй кешенінен баспана таңдауға болады.

Алдағы уақытта бағдарламаға өзге өңірлердегі тұрғын үй нысандарын қосу жоспарланып отыр.