9 жылда 900 сағат: Сирияға алғашқы көмекті жеткізген қазақстандық ұшқыш

Солардың бірі — 9 жыл ішінде әуе кеңістігінде 900-ден астам сағат өткізген кеме командирі Берікболсын Хабиболла. Мектеп қабырғасында жүріп-ақ алғаш рет ұшақ тізгіндеген ұшқыштың өмір жолы мен Сириядағы гуманитарлық миссиясы туралы айтып берді.

Берікболсынның ұшқыш болуына нағашы ағасының ықпалы зор болған. Кішкентай кезінен әуежайда ұшақтарды көріп өскен ол 9-сыныпта Астанадағы азаматтық авиация орталығына қабылданады. Денсаулығы да жарап, тестілеуден мүдірмей өткен жасөспірім мектептен кейін қосымша сабақтарға қатысып, алғаш рет аспанға көтерілген.

— Бұл менің әуе кемесіне бірінші рет көтерілуім еді. Азаматтық авиация орталығы мектептерден жасөспірімдерді таңдап, емтихан алып, кішкентай ұшақпен ұшуға мүмкіндік берді. Нағашы ағам да ұшқыш болғандықтан, әуе кемелері маған бұрыннан жақын еді. Алматыдағы Азаматтық авиация академиясында оқып жүріп, Латвия, Литва, Эстония, Германия мен Испанияда тәжірибеден өттім. Piper, Cessna, Texan ұшақтары мен тікұшақтарды басқаруды үйрендім, — дейді Берікболсын Хабиболла Jibek Joly телеарнасының Bugin LIVE бағдарламасында.

Ұшқыштың айтуынша, Түркия мен Сириядағы жойқын зілзала кезінде Ұлттық ұланның Е8 көлік ұшағы Сирияға ең алғашқылардың бірі болып гуманитарлық көмек жеткізді. Байланыс пен навигация қиындықтарына қарамастан, тапсырманы мінсіз орындаған Берікболсын «Жауынгерлік ерлігі үшін» медалімен марапатталды.

— Сирияға гуманитарлық көмекті біз бірінші болып жеткіздік. Бұл жағдайда байланыс пен навигация бойынша қиындықтар көп болады. Ал аспандағы ең ерекше сәттердің бірі — Барселонаның үстінде ұшып бара жатқан кезім еді. Төменде жаңбыр, сұр бұлт, бірақ бұлтты тесіп шыққанда күн тек маған ғана жанып тұрғандай сезілді. Ондай көріністі сезінген адам аспаннан ешқашан шыға алмайды, ол жүректе мәңгілік қалады, — деп ағынан жарылды ұшқыш.

Бүгінде Берікболсын Ұлттық ұланда аптасына 3-4 рет оқу-жаттығу ұшуларын өткізіп, кез келген ауа райы жағдайында әуе кемесін басқару шеберлігін шыңдап жүр. Оның айтуынша, ұшқыш болу үшін тек физика мен математиканы білу жеткіліксіз, темірдей тәртіп пен мықты денсаулық қажет.

Айта кетейік, бұған дейін Ақтөбе аумағында құтқару, науқастарды тасымалдау тапсырмаларын орындайтын жас ұшқыш Битөре Оразбаймен қызметі жайлы сұхбат құрған болатынбыз.