Абай облысында дәрігерлер науқастың ішінен 6 кг ісікті алып тастады

АЛМАТЫ, 28 сәуір – Sputnik. Абай облысының Ядролық медицина және онкология орталығында дәрігерлер ерекше ота жасады, деп хабарлайды облыстық денсаулық сақтау басқармасы.

Онкогинекологтар 47 жастағы науқастың ішінен диаметрі 31 сантиметр, салмағы 6 килограмнан асатын ісікті сәтті алып тастады.

"Науқас әйел бірнеше жыл бойы гинекологтың профилактикалық тексеруінен өтпеген, себебі ешқандай шағымы болмаған. Тек осы жылдың ақпан айында пневмониямен қаладағы бір клиникаға түскен кезде жүргізілген тексерулер барысында ірі өскін анықталған. Осыдан кейін пациент қосымша тексеру мен ем алу үшін біздің орталыққа жолданды", – дейді дәрігерлер.

Орталыққа түскен кезде ол ішінің үлкеюіне және тәбетінің төмендеуіне шағымданған. Дәрігерлер лапароцентез жасаған.

"Құрсақ қуысынан шамамен 7 литр сұйықтық алынып, пациенттің жағдайы жеңілдетілді. Одан кейін бірнеше сағатқа созылған күрделі ота барысында хирургтар диаметрі 31 сантиметр, салмағы 6200 грамм ісікті алып тастады. Негізгі диагноз – сол жақ аналық бездің муцинозды шекаралық ісігі. Мұндай эпителиалдық жаңа түзілім ұзақ уақыт бойы айқын белгілерсіз дамуы мүмкін", – дейді мамандар.

Қазіргі таңда пациенттің жағдайы тұрақты, өміріне қауіп жоқ. Ол дәрігерлердің бақылауында болып, қалпына келу кезеңінен өтіп жатыр.