Адам жанының арашасы

Әрине, адам өмірінен қымбат ештеңе жоқ. Ал сол өмірдің шырағын сөндірмей, денсаулықтың сақшысы болып жүрген дәрігерлердің еңбегін бір ғана өлшеммен бағалау мүмкін емес. Әсіресе, ауылдық жерде күн мен түнге, ауа райына, уақытқа қарамай халықтың жанынан табылатын дәрігерлердің жауапкершілігі ерекше болса керек. Нұржамал Баяхметқызының да еңбек жолы осы сөздің нақты дәлелі дей аламыз.

1959 жылы Қарағанды қаласында дүниеге келген Нұржамал Бимағанбетова жастайынан білімге құштар болып өсті. 1976 жылы Торғай орыс орта мектебін тәмамдап, Алматы медицина институтына оқуға түседі. Сол кезден бастап оның өмір жолы медицинамен, адам денсаулығын қорғаумен тығыз байланысып кетті.

Жас маман оқуын аяқтаған соң еңбек жолын Жангелдин аудандық орталық ауруханасында бастады. Содан бері ондаған жыл бойы туған өлкенің тұрғындарына медициналық қызмет көрсетіп келеді. Дәрігер, отбасылық дәрігерлік емхана меңгерушісі, орталық аурухана бас дәрігерінің орынбасары секілді жауапты қызметтерді атқарып, әріптестері мен халықтың құрметіне бөленді.

Нұржамал Баяхметқызы – жоғары санатты терапевт дәрігер. Оның кәсіби шеберлігі мен ұйымдастырушылық қабілеті сан мәрте жоғары бағаланды. Денсаулық сақтау саласындағы ұзақ жылғы адал еңбегі үшін оған «Қазақстан Республикасының Денсаулық сақтау ісінің үздігі» атағы берілді. 2008 жылы «Ерен еңбегі үшін» медалімен марапатталды.

Мемлекет басшысы медицина қызметкерлерін марапаттады

Мамандыққа деген жауапкершілік пен үздіксіз ізденіс оның кәсіби даму жолында әрдайым басты ұстаным болды. 2012 жылы Денсаулық сақтау министрлігінің Медициналық және фармацевтикалық қызметті бақылау комитеті тарапынан денсаулық сақтау субъектілерінің қызметіне тәуелсіз сараптама жүргізу және медициналық қызмет сапасын бағалау саласы бойынша куәлік алды. Бұл оның тәжірибесі мен біліктілігінің жоғары деңгейін тағы бір мәрте дәлелдеді.

2011 жылы медицина қызметкерлерінің кәсіби мерекесіне орай өткен облыстық байқауда «Үздік ауыл дәрігері» номинациясының жеңімпазы атанып, республикалық деңгейдегі байқауға қатысу мүмкіндігіне ие болды. Сол жылы Денсаулық сақтау министрінің Алғыс хатымен марапатталса, 2012 жылы Қостанай облысы әкімдігі Денсаулық сақтау басқармасының Құрмет грамотасына ие болды.

Нұржамал Баяхметқызының қызметі тек медицинамен ғана шектелген жоқ. Халық сеніміне ие болған ол Жангелдин аудандық мәслихатының депутаты болып сайланып, өңірдің әлеуметтік мәселелерін шешуге де өз үлесін қосты.

Президент: Қазақстан озық технологияларды медицинаға белсенді түрде енгізіп жатыр

Дәрігердің кәсіби жетістігі оның кабинет қабырғасындағы марапаттарымен ғана өлшенбейтіні анық. Ол алғыс айтып келген науқастардың ықыласында, талай отбасының амандығында, елдің сенімінде болса керек. Нұржамал Баяхметқызының ғұмыры осындай сенім мен құрметке толы еңбек жолымен ерекшеленеді.

Президент қолынан алған дәрежелі марапат ауыл медицинасында аянбай еңбек етіп жүрген мыңдаған ақ халатты абзал жанның еңбегіне көрсетілген құрметтің белгісі деп түсінеміз. Ал Нұржамал Баяхметқызы сол буынның ең көрнекті өкілдерінің бірі ретінде туған өлкесінің тарихында өз қолтаңбасын қалдырды.

Білікті маманның өмір жолы жас дәрігерлерге кәсібіне адалдықтың, елге қызмет етудің және адам денсаулығын бәрінен биік қоюдың жарқын үлгісі болып қала бермек.

«Құрметіңіз» құтты болсын, адам жанының арашасы, ақ халатты абзал жан!

Гүлім ЫСМАҒҰЛ, журналист

Қостанай облысы