АЭА ларды дамытудың жаңа моделі әзірленіп жатыр

— Президент 2025 жылғы 8 қыркүйектегі Қазақстан халқына Жолдауында арнайы экономикалық аймақтардың инвестиция тартудың, өнеркәсіпті дамытудың және өңірлердің экономикалық белсенділігін арттырудың маңызды құралдарының бірі екенін атап өтті. Сондай-ақ олардың қызметінің тиімділігін арттыру қажеттігін көрсетті. Осыған байланысты Үкіметке АЭА-ны дамытудың жаңа моделін пысықтау, сондай-ақ арнайы экономикалық аймақтарды жеке компаниялардың, оның ішінде шетелдік операторлардың басқаруына беру мәселесін қарау тапсырылды, — деп атап өтеді министрліктен агенттік сауалына орай.

Ведомство аталған тапсырманы іске асыру арнайы экономикалық аймақтардың қызметін реттейтін заңнамалық және заңға тәуелді актілерге өзгерістер енгізуді талап етуі мүмкін екендігіне назар аудартады.

— Министрлік аталған тапсырманы орындау аясында АЭА-ны дамытудың инвестициялық тартымдылығын арттыруға, басқару тетіктерін жетілдіруге, аймақтардың мамандануын күшейтуге және жобаларды іріктеу сапасын арттыруға бағытталған жаңа тәсілдерін қалыптастыру бойынша жұмыс жүргізуде. АЭА-ны дамытудың жаңа моделі бекітілгеннен кейін министрлік қосымша ақпарат ұсынуға дайын, — деді Өнеркәсіп министрлігі.

Бұған дейін инвестордың АЭА инфрақұрылымын салуға кеткен шығынын өтеу тетігі енгізілетінін жазған едік.