АХҚО сотында Moot Court байқауы өтті

Астана халықаралық қаржы орталығында заң жарысы өтті.

«AIFC  Moot Court» сегізінші жыл сайынғы байқауға елден бөлек Еуразия құрлығынан заңды оқып жатқан студенттер қатысады. Олар құқықтың белгілі бір саласын саралап, ұстанымдарын қорғау үшін құжаттар дайындайды. Сондай-ақ Астана халықаралық қаржы орталығы сотының тәжірибелі судья-практиктерінің алдына ауызша аргументтерін ұсынады. Жалпы арнайы бағдарлама аясында 6500-ден аса адам құқықтың үстемдігі және халықаралық коммерциялық дауларды шешу бойынша оқудан өтті. Ал 220-дан аса студент іскерлік әкімшілендіру тағылымдамасын тәмамдаған. Астана халықаралық қаржы орталығының соты – тәуелсіз құқықтық құрылым. Англияның жалпы құқық жүйесіне негізделген процессуалдық ережелері бар.

Кристофер Кэмпбелл-Холт Oвe, АХҚО және ХТО соты аппарат басшысы және тіркеушісі:

- Астана халықаралық қаржы орталығы сотының бүгінгі сот отырыстарының байқауы – бұл біздің соттың іс жүзінде қалай жұмыс істейтінін көрсету мүмкіндігі. Бұл Қазақстанның және басқа елдердің үздік заңгер студенттеріне нақты сот процесінде өзін сынап көруге және білімдерін дәлелдеу деңгейі десе де болады. Дәл осы студенттер – Астана халықаралық қаржы орталығы сотының, Халықаралық төрелік орталықтың және әрине Қазақстанның заң қоғамдастығының болашағы. 7 жарым жылда біз 4 жарым мыңнан аса істі қарастырдық. Бұл әлемдегі теңдесі жоқ нәтиже. Менің білуімше, басқа бірде-бір халықаралық қаржы орталығы мұндай деңгейге жеткен жоқ. 25 жылдық заңгерлік мансабымда бүкіл әлемдегі көптеген осындай орталықтармен жұмыс істедім.