Әйел танысын өлтіріп, мәйітін кереуеттің астына жасырған: 25 сәуір 09:32 жаңалықтар

Солтүстік Қазақстан облысында танысын өлтіріп, мәйітін кереуеттің астына жасырған әйелге қатысты сот үкімі шықты. Оқиғадан кейін ол бірнеше күн бойы әдетінше өмір сүріп, жұмысқа барып жүрген, - деп хабарлайды Tengrinews.kz тілшісі.

Солтүстік Қазақстан облысында танысын өлтіріп, мәйітін кереуеттің астына жасырған әйелге қатысты сот үкімі шықты. Оқиғадан кейін ол бірнеше күн бойы әдетінше өмір сүріп, жұмысқа барып жүрген, - деп хабарлайды Tengrinews.kz тілшісі.

Адам шошырлық бұл іс СҚО қылмыстық істер жөніндегі мамандандырылған ауданаралық сотта қаралды. Қызылжар ауданы Бескөл ауылының 53 жастағы тұрғыны айыпталды.

Іс материалдарына сәйкес, биыл 27 ақпанда әйел аулаға шығып, отын жармақ болып қолына балта алған сәтте үйіне танысы келген. Ер адам қатты мас болған. Әйел одан кетуін сұрағанымен, ол үйде қалғысы келген.

"Сот үкімінде айыпталушының жауабы келтірілген. Оның айтуынша, ол есікті жабу үшін ер адамның арт жағынан айналып өткен. Сол кезде ер адам оған қарай құлай бастаған. Әйелдің сөзінше, ол "аздап қорқытпақ болып" балтамен екі рет жылдам соққы жасаған. Алайда балтаның шүйдесіне дүмімен емес, өткір жүзімен тигенін байқамағанын айтқан. Соққыдан кейін жәбірленуші етпетінен құлаған", - делінген үкімде.

Осыдан соң әйел едендегі қан іздерін жуып, тіршілік белгісі байқалмаған ер адамды бөлмеге сүйреп апарып, кереуеттің астына жасырған.

Кейін бірнеше күн бойы жұмысқа барып, көршілерімен және ауылдастарымен сөйлесіп, үйіне қайтып келіп жүрген. Тіпті мәйіт жатқан кереуеттің үстінде ұйықтаған.

ОБСУЖДАЕТСЯ СЕЙЧАС

“Өкінемін, кінәлімін“: Қостанайда полицейге шабуыл жасағандар кешірім сұрады

02 сәуір 14:44 1

Алматыдағы жантүршігерлік жол апатына кінәлі жүргізуші туралы не белгілі?

24 наурыз 13:04 1

Қорғаныс министрлігі Атырау облысында әскери техника түсірілген видеоға пікір білдірді

31 наурыз 16:22 1

Сот отырысында айыпталушы болған оқиға туралы полицияға хабарламақ болғанын, бірақ телефонында бірлік болмағаннан қоңырау шала алмағанын айтқан.

Осы арада қаза тапқан ер адамның анасы мен бауыры оның жоғалғаны туралы полицияға арыз түсірген. Тәртіп сақшылары ер адамды соңғы рет дәл осы әйелмен бірге көргенін анықтаған.

"Сотта куәлік берген полиция қызметкерлерінің айтуынша, олар айыпталушыны жұмыс орнынан алып, үйіне барған. Пәтерге кірген кезде жағымсыз иіс сезілген. Қызметкерлердің бірі иіс жертөледен шығып жатқан жоқ па деп тексеруге кеткен. Ал қалған полицейлер жатын бөлмеге кіріп, кереуеттің астынан із-түзсіз кеткен ер адамның мәйітін тапқан. Осыдан кейін әйел болған оқиғаны айтып берген", - делінген үкімде.

Айыпталушы сотта адам өліміне себеп болғанын толық мойындағанымен, қылмыстың саралануымен келіспеген. Ол адам өлтіру ниеті болмағанын, ер адамды тек қорқытпақ болғанын алға тартқан.

Алайда сот бұл уәжге сын көзбен қарап, оны жауапкершіліктен жалтару әрекеті деп бағалады.

Сот үкімінде әйелдің қылмыстан кейінгі әрекеті де ескерілген. Ол жәбірленушіге көмек көрсетуге тырыспаған. Сондай-ақ, полицияға хабарлауға мүмкіндігі бола тұра, жұмысқа барып, өз шаруасымен айналысқан.

Сотта әйелдің бұған дейін де адам өлтіргені және ауыр дене жарақатын салғаны үшін сотталып, жазасын өтегені анықталды. Сондықтан сот оның әрекетін қауіпті қылмыстық қайталау деп таныды.

СҚО қылмыстық істер жөніндегі мамандандырылған ауданаралық сотының судьясы Ерлан Нұршәріпов айыпталушыны кінәлі деп танып, 14 жылға бас бостандығынан айыру жазасын тағайындады. Ол жазасын қауіпсіздігі барынша жоғары қылмыстық-атқару жүйесі мекемесінде өтейді. Сонымен қатар, сотталған әйелге жазасын өтеу орнында алкоголизмнен мәжбүрлі ем тағайындалды.

Үкім әзірге заңды күшіне енген жоқ. Сотталған әйел оны апелляциялық тәртіпте шағымданбақ.

Сілтемесіз жаңалық оқисыз ба? Онда Telegram желісінде парақшамызға тіркеліңіз!