Мәйітті төсектің астына жасырып, жұмысқа барып жүрген : СҚО да танысын өлтірген әйел жауапқа тартылды

Солтүстік Қазақстан облысында келіншек танысын өлтіріп, оның денесін бірнеше күн бойы төсектің астына жасырып қойған. Марқұмның мәйіті табылғанға дейін әйел жұмысына барып, қалыпты өмірін сүрген, - деп хабарлайды Aikyn.kz.

Оқиға Қызылжар ауданының Бескөл ауылында болған. Qazaqstan Media басылымы жазғандай, айыпталушы 53 жастағы Эльмира Шевелева осы ауылдың тұрғыны. Ауылдастары оның мінезін қызуқанды деп сипаттайды.

Ол бұған дейін де бірнеше рет сотталған екен. Алғаш рет – 2009 жылы, адам өлтіргені үшін жеті жарым жылға сотталған. Араға тура 10 жыл салып, Шевелева тағы да колонияға түскен. Бұл жолы ауыр дене жарақатын салғаны үшін 4 жылға түрмеге түскен. Ол кезде үш бөтелке арақ ішіп, танысының әйеліне пышақ сұққан.

Бостандыққа шыққаннан кейін ол полиция тіркеуінен түспеген, әкімшілік сотқа да талай барған. Әйел таныстарын балағаттап, көршілермен жанжалдасып, тәртіп бұзып, сол әрекеттері үшін жауапқа да тартылып отырған. Сол кездерде ол жаза ретінде қоғамдық жұмыс емес, әкімшілік қамауды сұраған. «Денсаулығым жоқ, ал айыппұл төлеуге ақшам жоқ» деген уәж айтқан.

Қайғылы оқиға биыл 27 ақпанда Шевелеваның пәтерінде болған. Кешкі сағат алты шамасында ол отын жару үшін қолына балта алып, үйінен шыққалы жатқанында танысы Мехоношин келген. 

Әйелдің айтуынша, масаң күйдегі Мехоношин оның үйіне шақыруысыз келіп, кетуден бас тартып, онда түнегісі келген. Екеуі сөзге келіп, ақыры қайғылы жағдайға ұласқан. Артынан әйел жедел жәрдем де, полиция да шақырмаған. Қанды жуып, мәйітті бөлмеге сүйреп апарып, төсектің астына жасырған.

Айтуынша, телефон теңгерімінде ақша болмағандықтан, ешкімге хабарлай алмаған.

Бірнеше күн бойы ер адамды туыстары мен полиция іздеген. Ал әйел сол аралықта жұмысына барып, таныстарымен араласып, қалыпты өмір сүрген. 1 наурыз күні іздестіру барысында полиция қызметкерлері Шевелеваның үйіне барып, кірген бойда мәйіттің иісі сезген. 

– Мәйіт жатын бөлмеге кірген кезде диванның астынан табылды. Осыдан кейін Шевелева болған жайтты айтып берді, – деді сотта полиция қызметкері.

Қорғау тарапы бұл әрекет абайсызда жасалғанын дәлелдеуге тырысқан. Алайда сот бұл нұсқаны қабылдамады. Себебі соққы өмірлік маңызды тұсқа – басына тиген. Шевелеваны адам өлтіру қылмысын жасағаны үшін кінәлі деп танып, 14 жылға бас бостандығынан айыру жазасы тағайындалды. Ол жазасын барынша қатаң режимдегі колонияда өтейді. Сондай-ақ ол жерде алкоголизмнен емделуі тиіс.

Үкім әлі заңды күшіне енген жоқ, сотталған тарап оны апелляция тәртібімен шағымдана алады.