Айтыскерлер Айбек Қалиев пен Сара Тоқтамысова су жаңа пәтердің иесі атанды

Белгілі айтыскер ақындар Сара Тоқтамысова мен Айбек Қалиев жаңа пәтерге ие болды, деп Arasha.kz тілшісі Skifnews.kz сайтына сілтеме жасап хабарлайды.

Өнер иелері елордада өткен «Алтын домбыра» айтыскер ақындар байқауына қатысып, жоғары нәтиже көрсетті.

Сара Тоқтамысова әлеуметтік желідегі жазбасында айтыс өнерінің ауырлығы мен алған сыйдың рухани маңызын атап өтті:
— «Шынымды айтсам, бұл айтысқа қатысамын ба, жоқ па деп көп ойландым. Айтыс – ең ауыр өнер. Әйелдің жаны нәзік, ал мұндай сахнада тіс қаққан ер ақындармен сөз қағыстыру оңай емес. 25 жыл бойы айтыс сахнасында жүрмін, ешқашан қазылардың шешімін сынға алған емеспін. Маңдайыма бұйырған несібеге шүкіршілік етемін. Бүгінгі айтыс мен үшін ерекше өтті – Махат ағам Астананың төрінен пәтердің кілтін табыстады. Бұл мен үшін жай үй емес, еңбегіме берілген батаның, өнердің және адалдықтың символы», – деп жазды ақын.

Алайда бұл жаңалық әлеуметтік желіде қызу талқыланып, көпшіліктің пікірі екіге бөлінді. Кей қолданушылар ақындарға құттықтау мен қолдау білдірсе, енді бір бөлігі пәтерді жас ақындарға беру керек еді деген пікір айтты.

— «Құтты болсын, іші жанға толсын!»,
— «25 жылдан бері айтыста жүргендер пәтер мен көлікті алып жатыр, осы жолы жастарға бұйыру керек еді»,
— «Жеті жыл үзілістен кейін сахнаға қайта оралды»,
— «Жас ақындардың еңбегі елеусіз қалды» — деген пікірлер жазылды.

Айта кетейік, биылғы «Алтын домбыраның» бас жүлдесі Айбек Қалиевке бұйырды.