Кәсіпкерлер айтыскер Сара Тоқтамысова мен Айбек Қалиевке Астанадан жаңа пәтер сыйлады (видео)

Айтыскер ақын Айбек Қалиев пен Сара Тоқтамысоваға Астанадан жаңа пәтер берілді, – деп жазды Aikyn.kz.

Ақындар "Алтын домбыра" айтысына қатысып, жүлделі орынға ие болған. Сара Тоқтамысова пәтермен қоса темір тұлпар, ат мінгізгенін айтып, демеушілік жасаған жандарға алғыс білдірді. 

«Олжалы күн. Ұлттық өнердің ұлы тойы – «Алтын домбыра» айтысына қатысып, қазақтың сөз өнерінің биігінде тағы да қанат қақтым. Араға қаншама жыл салып, Астанада болатын басты айтысқа қатысу үлкен еңбекті талап етеді. Қазақтың атымтай жомарттары  демеушілік еткен "Алтын домбыра" айтысы 2 күнде өте шықты. Шынымды айтсам осы айтысқа қатысамын ба, қатыспаймын ба?» деп, екі ойлы болдым. Айтыс – ең ауыр өнер. Бүгінгі ішкі күйім өзіме ғана мәлім. Әйелдің жаны нәзік келеді . Мынадай өнерде тіс қаққан азулы ер-азаматтармен сөз сынасу оңай дүние емес. 25 жыл айтыс сахнасында жүрмін ғой. Ешуақытта өз тарапымнан әділқазыда бір жерлес ағам сәл бұра тартты немесе қазылардың бүйрегі бұрған екен деген әңгіме болған емес. Маңдайыма жазылған несібені алып, шүкірлігімді жасап жүрген жанның бірімін. Дәл бүгін өнерге деген адалдықты бағалап, ұлттық рухтың қадірін терең түсінетін жаны жомарт азамат Махат ағам  мені ерекше құрметке бөледі. Астананың төрінен сыйлаған пәтері мен үшін тек қабырғасы бар үй емес, жолымның дұрыстығына берілген батасы іспетті. Ол баспана өнердің, еңбектің, адалдықтың киесімен өрілген ордадай. Екінші жүлдемді айтайын. Ол ағатайым ұсынған темір тұлпар. Былтырда айтысқа өз тарапынан 4 көлік табыстаған. Биылда 3 көлік табыстады. Үшінш жүлдемді айтайын. Сайран ағамның мінгізген тұлпары. Ақ көңілімен екі ақынға жүлде тіккен екен. Біреуін маған табыс етті. 100 жасаңыз аға! Қазақтың рухын көтерер осындай азаматтар аман болсын!», - деп жазды айтыскер.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.