Академик Сұлтан Сартаев атындағы аудитория ашылды

Әл-Фараби атындағы Қазақ ұлттық университетінің Заң факультетінде Заң ғылымдарының докторы, профессор, Қазақстан Республикасының Ұлттық Ғылым Академиясының академигі Сұлтан Сартайұлы Сартаевтың есімі берілген аудиторияның салтанатты ашылуы өтті.

Бұл шара-заң ғылымының дамуына зор үлес қосқан тұлғаға деген құрметтің және жас ұрпаққа өнеге көрсетудің айқын көрінісі. С. Сартаев - азаматтық құқық, еңбек құқығы және азаматтық іс жүргізу салаларының дамуына ерекше үлес қосып, ұзақ жылдар бойы әл-Фараби атындағы Қазақ ұлттық университетінің Заң факультетінде қызмет атқарды. Оның ғылыми жетекшілігімен заң ғылымдарының докторлары және заң ғылымдарының кандидаттары дайындалды.

Академик өзіндік ұстанымы бар, өз ойын дұрыс жеткізе білетін тұлға еді. 

Ғалымның зерттеулері еліміздегі азаматтық-құқықтық қатынастарды жетілдіруге, еңбек қатынастарын құқықтық тұрғыдан реттеуге бағытталды. Ол - бірқатар ғылыми еңбектер мен оқу құралдарының авторы, заң саласындағы тәжірибені жетілдіру ісінде белсенді қызмет еткен тұлға.

Академик Сұлтан Сартайұлы Сартаев атындағы аудиторияның салтанатты ашылуына факультет басшылығы, профессор-оқытушылар құрамы, студенттер және ғалымның әріптестері қатысты. Салтанатты жиында қатысушылар Сұлтан Сартайұлының құқықтық білім беру жүйесін дамытудағы еңбегін ерекше атап өтіп, оның ұстаздық жолы мен адамдық бейнесін мақтанышпен еске алды. Жаңа аудитория заманауи талаптарға сай жабдықталып, студенттер мен магистранттардың сапалы білім алуына, ғылыми-зерттеу жұмыстарын жүргізуіне арналған.Мұнда құқық саласына қатысты дәрістер, пікірталастар және ғылыми кездесулер өтетін болады. С.С. Сартаевтың ғылыми еңбектерін оқып, зерттеу терең білімді әрі ерекше қабілеттің болуын қажет етеді. Оның еңбектерінің көпшілігі мемлекеттің құқықтық негізі мен қоғамдық құрылысына арналып жазылған. 

Сұлтан Сартаев Қазақстан мемлекеттілігінің қалыптасуын терең әрі жан-жақты зерттеп, оның арықарай дамуының маңызы мен ерекшелігін терең талдаған ғалым.

Академик Сартаевтың есімі-отандық заң ғылымының мақтанышы, адалдық пен білімнің символы. Әл-Фараби атындағы Қазақ ұлттық университетінде ашылған Сартаев атындағы аудитория – ғалымның өмір жолына тағзым әрі университеттің бай ғылыми дәстүрін жалғастырудың көрінісі. Бұл игі бастама жас заңгерлердің бойында адалдық, әділет және кәсіби жауапкершілік құндылықтарын қалыптастыруға бағытталған маңызды қадам болып табылады. Оқу орнының қабырғасынан талай білікті заңгерлер шығып,ұстаздың өнегелі жолын жалғастыра беретініне сенім мол.

Сулейменова С.Ж
әл-Фараби атындағы ҚазҰУ-дың заң факультеті  азаматтық құқық,

азаматтық іс жүргізу және еңбек құқығы кафедрасының оқытушысы,

заң ғылымдарының докторы, профессор