Актер Асқар Жұмабеков қамалды

Актер Асқар Жұмабеков ұсақ бұзақылық үшін 10 тәулікке қамауға алынды. Бұл туралы полиция өкілдері мәлімдеді, деп хабарлайды Arasha.kz.

Бұған әріптесі Айнұрдың әлеуметтік желіде жариялаған видеожазбасы себеп болған. Оның айтуынша, актер түсірілімге ертерек оятуды өтінген, алайда ол хабарласқан кезде актер оған агрессия көрсеткен.

Полицияның нақтылауынша, оқиға фактісі бойынша Алматы қаласы Медеу аудандық Полиция басқармасының қызметкерлері тексеру жүргізді. Ер адам бөлімшеге жеткізіліп, оның үстінен әкімшілік іс қозғалды.

Құқық қорғау органдарының мәліметінше, ол қоқан-лоқы көрсетіп, өзін агрессивті ұстаған, былапыт сөздер айтып, бойжеткенге анық сыйламаушылық танытқан.

Актердің өзі адамды емес, чемоданды тепкенін, бірақ дауыс көтеріп, балағат сөздер айтқанын жоққа шығармайтынын мәлімдеді.

Материалдар сотқа жолданып, сот оған 10 тәулікке әкімшілік қамауға алу жазасын кесті.

Айта кетерлігі, бұл оның басындағы алғашқы жағдай емес. 2023 жылы Жұмабеков караоке-бардағы төбелеске қатысқаны үшін сотталған болатын, ал 2024 жылы Қазақстанның Жоғарғы соты жазаның өтелмеген бөлігін айыппұлмен алмастырып, актер бостандыққа шыққан еді.