Әл Фараби даңғылының ортасында жүргізушілер жанасусыз айқас көрсетті: video

Қазнетте әл-Фараби даңғылында болған ерекше қақтығыстың видеосы тарап жатыр. Threads желісінде жарияланған ролик туралы Tengri Auto хабарлайды.

Қазнетте әл-Фараби даңғылында болған ерекше қақтығыстың видеосы тарап жатыр. Threads желісінде жарияланған ролик туралы Tengri Auto хабарлайды.

Мән-жайы

Қала тұрғыны түсірген бейнежазбадан екі ер адамның жол үстінде бір-біріне қарай сес көрсетіп, ерегісіп жатқанын көруге болады, алайда олар төбелеске дейін жетпеген.

"Алматы, әл-Фараби даңғылы. Жаңалық емес. Қол көтермей төбелесу", - деп жазды видео авторы.

Видеодан кадрлар Желі қолданушыларының реакциясы

Көптеген қолданушы роликке әзілмен жауап берді. Олардың кейбірі қатысушылардың "техникасын" келемеждегенімен, жанжалдың үлкен төбелеске ұласпағанына қуанышты екенін білдірді:

"Пышаққа жүгінгенше, осылай түсініскендері жақсы"; "Сыбырласуға шығыпты"; "Қарбаластан шаршап, көлік туралы сөйлесуді ұйғарған ғой". Threads-тен скриншот

Сонымен қатар болған жағдайға алаңдап, жүргізушілердің іс-әрекеті апаттық жағдай туғызғанына наразы болғандар да бар.

Полиция пікірі

Біз пікір алу үшін Алматы Полиция департаментіне хабарластық. Ведомство өкілдері аталған дерек бойынша тексеру жүріп жатқанын хабарлады.

"Оқиғаның барлық мән-жайы, сондай-ақ қатысушылардың жеке басы анықталып жатыр. Тексеру қорытындысы бойынша олардың әрқайсының іс-әрекетіне еліміздің қолданыстағы заңнамасына сәйкес құқықтық баға беріледі", – деп хабарлады Алматы ПД баспасөз қызметі.

Тәртіп сақшылары жолдағы шиеленісті мұндай тәсілмен шешуге жол берілмейтінін баса айтты.

"Әсіресе, жол қозғалысының басқа қатысушыларының қауіпсіздігіне қатер төнетін жол жиегінде мұндай әрекеттерге бармау керек. Даулы жағдайлар туындаған кезде азаматтар заң аясында әрекет етіп, жанжалдың ушығуына әкелетін іс-қимылдарға жол бермеуге тиіс", – деп түйіндеді баспасөз қызметі.

Айта кетейік, 21 наурызда Алматыда резонанс тудырған жол-көлік оқиғасы болды: әл-Фараби мен Меңдікұлов көшелерінің қиылысында Mercedes пен Zeekr автокөліктері соқтығысты. Жол-көлік оқиғасы салдарынан үш адам қаза тапты. Mercedes көлігінің 29 жастағы жүргізушісі мен 20 және 22 жастағы екі жолаушы қыз оқиға орнында көз жұмды. Zeekr жүргізушісі аман қалып, әртүрлі жарақатпен ауруханаға жеткізілді. Оқиға кезінде ол мас күйде болған.

Сонымен қатар, мемлекеттік нөмір белгілері заңсыз берілуі мүмкін деген уәждер бойынша ішкі қауіпсіздік департаменті қылмыстық іс қозғап, бірқатар лауазымды тұлға қызметінен айырылды.

Следите за нашими новостями в Google News

Подписаться