Әлем буллингпен қалай күреседі?

Буллинг мәселесі – әлем елдері үшін ортақ түйткіл. Ол тек мектеп қабырғасында ғана емес, интернет кеңістігінде де тамыр жайған.

Мемлекеттік органдар бұл қауіпті құбылыспен күрестің түрлі жолын іздеп әлек.

Америкада буллингпен күрес шаралары заңмен бекітілген. Барлық штаттар мектептерді буллингке қарсы нақты саясат жүргізуге және шағымдарға жауап беруге міндеттейді. Ел деңгейінде «Stopbullying.gov» атты федералды портал жұмыс істейді. Ол ата-аналар мен оқушыларға қиын жағдайдан шығу жолдарын ұсынады. Мектептер де қауіпсіздік пен өзара құрмет тақырыбын насихаттайды. Соңғы жылдары бұл іске заманауи технология да қосылды: арнайы цифрлық жүйелер мектеп чаттары мен әлеуметтік желілерді бақылайды, бұл қауіп-қатерді ерте анықтауға мүмкіндік береді. Жергілікті биліктің мәліметінше, дәстүрлі буллинг азайғанымен, кибербуллинг жағдайлары көбейіп келеді. Сол себепті бүгінде басты назар – балаларды онлайн кеңістікте қорғауға аударылған.

Ал Германия мектептері - мәселенің салдарына емес, оны алдын алу шараларына басымдық беріп отыр. Балаларға жауапкершілік пен цифрлық мәдениеттің негіздері үйретіледі. Оқушылар буллингке қарсы хартияға қол қояды. Сауалнамаларға сүйенсек, шамамен 15% оқушы мектепте психологиялық зорлық-зомбылыққа, бопсалауға  ұшырағанын айтады. Егер жағдай ауыр болса, қылмыстық жауапкершілікке тартылуы мүмкін. Оқу орындары медиа сауаттылықты арттыру бағдарламаларын да енгізіп жатыр.

Мектептерге арнайы білімі бар мамандар келіп, шеберлік сабақтарын өткізеді, нақты мәселелерді шешуге көмектеседі. Бұдан бөлек, елде тегін сенім телефоны жұмыс істейді - кез келген адам хабарласып, кеңес пен көмек ала алады.

Бұрын Жапониядағы мектеп жүйесінің жабықтығы буллинг жағдайларын жиі жасыратын. Бірақ белсенділердің бастамасымен 2013 жылдан бастап елде әрбір буллинг фактісін тіркеуді міндеттейтін заң қабылданды. Заң күшіне енген соң келеңсіз оқиғалар қарқынмен тіркеле бастады. Алайда билік мұны буллингтің өсуі емес, мәселенің ашық айтыла бастауы деп санайды. Мектептерде әрбір буллинг дерегін  қарайтын арнайы комитеттер құрылды, олардың құрамында мұғалімдер мен ата-аналар бар. Ал оқу бағдарламасына эмпатия мен құрмет сабақтары енгізілген. 

Оңтүстік Кореяда буллингке қарсы қатаң заңдар бар. Психологиялық қысым фактісі тіркелген жағдайда оқушыны мектептен шығару немесе ата-анасына тәртіптік шаралар қолдану міндеттелген. Мәселені жасыратындар үшін анонимді мобильді қосымшалар іске қосылған. Бұл жерде де заман ағымына сай басты назар онлайн буллингке ауған. Ресми деректер бойынша, жасөспірімдер арасындағы цифрлық қысым көрсету оқиғалары айтарлықтай өскен.

Авторы: Әйгерім Ардаққызы