Әлемде жыл сайын 55 мыңнан астам адам құтыру ауруынан көз жұмады

2025 жылы республика бойынша құтырудың 3 жағдайы өліммен аяқталған (2024 ж. – 0). Жануарлардың тістеуі, тырнауы және сілекейлеуі салдарынан медициналық көмекке 60 153 адам жүгінген. Ал осыы жылдың І тоқсанында – 14 134 адам. Барлығына медициналық көмек көрсетілді.
Денсаулық сақтау министрлігі мәліметінше, халықтың арасында құтырудың профилактикасы мақсатында медицина қызметкерлері мен санитариялық-эпидемиологиялық қызмет тарапынан тұрақты түрде санитариялық-ағарту жұмыстары жүргізіліп жатыр.
Құтырумен күрестің негізгі шарасы – дереу құтыруға қарсы вакцинациялау курсынан өту және тістелген, тырналған немесе сілекей тиген жерді 20% сабынды ерітіндімен молынан жуу.
Құтырудың алдын алу үшін мыналар ұсынылады:
* жабайы жануарлармен байланысқа түспеу. Өйткені сау жабайы жануарлар әдетте адамнан қашқақтайды;
* үй жануарларына құтыруға қарсы профилактикалық екпелерді міндетті түрде жасау;
* үй жануарының мінезі өзгерсе, басқа жануардан жарақат алса немесе себепсіз өлсе, міндетті түрде ветеринар маманға жүгініп, бақылау орнату немесе өлім себебін анықтау;
* егер жануармен (сырттай сау көрінсе де) байланыс болған жағдайда, тұрғылықты жердегі травматологиялық пунктке дереу жүгініп, жараны өңдету және вакцинациялав курсынан өту қажет. Вакцинациялау тегін жүргізіледі. Жараны шаруашылық сабынды мол қолдана отырып өңдейді;
* тағайындалған емнен еш жағдайда бас тартпау және өз бетінше тоқтатпау қажет, себебі бұл қайғылы салдарға әкелуі мүмкін.

Құтыруды емдейтін дәрі жоқ. Ауру жануар тістеген адам үшін құтыруға қарсы вакцина – өмірді сақтап қалудың жалғыз мүмкіндігі. Сондықтан вакцинациялауды дереу жүргізу қажет.
Арнайы емнің (құтыруға қарсы вакцина және иммуноглобулин алу) тиімділігі тістегеннен кейін медициналық көмекке жүгіну уақытына тікелей байланысты екенін есте ұстау қажет.

Айта кетейік, ШҚО-да ірі қараға түлкіден тараған құтыру ошағы оқшауланды.