Алматыда биыл 300 ден астам жаңа Сергек кешені орнатылады

Наурыз айының басында алматылықтар қала көшелерінде жаңа камералар орнатылып жатқанын байқап, бұл туралы пікірлерін әлеуметтік желіде белсенді бөлісті. Мысалы, желіде жарияланған бейнежазбалардың бірінде — Төле би көшесінде жаңа камералардың көптігі көрсетілген. 

Алматы қаласының полиция департаменті агенттік сауалына берген жауабында жаңа бейнебақылау жүйелерінің жұмысына қатысты түсінік берді. Полиция қазір қала көшелерінде камераның өзге түрлері емес, тек «Сергек» аппараттық-бағдарламалық кешендері орнатылып жатқанын атап өтті.

Биыл 1 наурыздан бастап жол қауіпсіздігін бақылайтын 1 мың камераның қасына 200 «Сергек» орнатылған. Сәуір айына дейін 750 камераның қасына тағы 150 ақылды бейнебақылау жүйесі қойылады.

— 2024-2028 жылдарға арналған жол қауіпсіздігін қамтамасыз ету тұжырымдамасын іске асыру жөніндегі іс-қимыл жоспарын орындау үшін 2026 жылы 1750 камераға қосымша 350 «Сергек» кешені орнатылып жатыр. Олар қаладағы барлық көлік қозғалысын бақылайды, сондай-ақ жол-көлік ережесі бойынша заң бұзуды тіркейді, — деп түсіндірді департаменттен.

Еске салайық, 12 наурыздан бастап Әкімшілік құқық бұзушылық туралы кодексінің 31-бабына Қазақстан Республикасының Цифрлық кодексі аясында қабылданған өзгерістер күшіне енді. 

Ол бойынша камералар жол ережесін бұзудың жаңа деректерін тіркей бастады. Атап айтқанда, көлік басқарып отырғанда телефон пайдалану және қауіпсіздік белдігін тақпау, сондай-ақ міндетті сақтандыру полисінің болмауы, техникалық байқаудың мерзімінің өтуі сынды құқық бұзушылықтар автоматты түрде тіркеліп жатыр. Бұл да қала көшелерінде «Сергек» кешенінің көбеюіне әсер еткені болуы тиіс.

Бұған дейін Алматы облысында орташа жылдамдық камералары орнатылғанын жазғанбыз.