Алматыда биыл 300 шақырымнан астам электр желілері ауыстырылады

Алматы әкімдігінің мәліметінше, бағдарлама аясында 2026 жылы 379 шақырым электр желісін қайта жаңарту жоспарланып отыр. Оның ішінде 269 шақырымы «Алатау Жарық Компаниясы» АҚ-ның басқаруындағы желілер. Сонымен қатар 14 жаңа жобаны іске қосу және 8 өтпелі жобаны жалғастыру көзделген.

– Басымдық жаңа қосалқы станциялар мен тарату пункттерін салуға, сондай-ақ әуе желілерінің бір бөлігін кабельдік форматқа көшіруге беріледі. Бұл шаралар энергия жүйесінің тұрақтылығын арттырып, қаланың қолданыстағы және жаңа аудандарын үздіксіз электрмен қамтуға мүмкіндік береді, - деп хабарлады әкімдіктен.

Негізгі жобалар қатарында Жетісу ауданындағы «Кирпичная» қосалқы станциясының құрылысы, «Нұр-Алатау» шағын ауданын электрмен жабдықтау, сондай-ақ Бостандық, Наурызбай, Алатау және Медеу аудандарындағы желілерді қайта жаңарту жұмыстары бар.

Одан бөлек қызмет көрсетудің жеделдігін арттыру және апаттарды жою уақытын қысқарту үшін жаңа аудандық пайдалану бөлімшесін құру жоспарланып отыр.

Еске салайық, бұған дейін Алматы электр станциялары қосымша қызметпен энергияны міндеттеп сатқаны үшін тексеріліп жатқанын жазғанбыз.